Ársfundur Nýlistasafnsins 2013 var haldin 24. Maí sl.

Lesin var skýrsla stjórnar, ársuppgjör og fjárhagsáætlun voru kynnt, auk þess sem útgáfur voru kynntar.

Endurskoðaðan ársreikning Nýlistasafnsins fyrir árið 2012 má finna hér .

Ný stjórn var kjörin
Gunnhildur Hauksdóttir (formaður stjórnar)
Eva Ísleifsdóttir
Margrét Áskelsdóttir
Ragnheiður Gestsdóttir
Rakel McMahon

Til vara:
Bjarki Bragason
Bryndís Hrönn Ragnarsdóttir
Guðni Gunnarsson

(Fráfarandi stjórn
Gunnhildur Hauksdóttir (formaður stjórnar)(, Indíana Auðunsdóttir (varaformaður), Gunndís Ýr Finnbogadóttir (ritari), Hjalti Þorkelsson (gjaldkeri), Guðni Gunnarsson (meðstjórnandi). Til vara: Ólöf Gerður Sigfúsdóttir, Bjarki Bragason og Karina Hanney Marrero.

Hér á eftir fer skýrsla stjórnar fyrir tímabilið 28. júní 2012 – 24. maí 2013

Innri starfsemi:

Fastir starfsmenn á tímabilinu:
Gunnhildur Hauksdóttir (safnstjóri, 80% starfshlutfall)
Gunndís Ýr Finnbogadóttir (framkvæmdastjóri, 60% starfshlutfall)
Gunndís Ýr tók tímabundið við starfi safnstjóra í einn mánuð í mars á meðan Gunnhildur fór í eins mánaða leyfi.
Karina Hanney Marrero listfræðingur tók við af Ingunni Fjólu Ingþórsdóttur sem safneignarfulltrúi. Karina er í 100% stöðu. Hún starfar við umsjón safneignar og að skráningu hennar í Sarp 0.3.

Starfsmenn í sérstökum verkefnum:
Unnar Örn Jónasson Auðarson, Auður Aðalsteinsdóttir, Ármann Agnarsson og Dan Meththananda, Ármann Agnarsson og Þorleifur Gunnar Gíslasson unnu ásamt aðilum úr stjórn að útgáfunum Catalouge Raisonné og Archive on the Run sem heyra undir vekefnið Uppspretta.
Ármann Agnarsson og Högni Valsson hanna sem fyrr allt efni fyrir safnið og hafa umsjón með útliti þess sem safnið sendir frá sér.
Tilfallandi prófarkalestrar og þýðingar voru auk þess unnar af ýmsum aðilum.
Stjórnarliðar hafa einnig unnið mikið sjálfboðastarf í uppsetingum sýninga og tilfallandi störfum sem endranær.
Jeannette Castioni er eins og áður lausráðin sem forvörður Nýlistasafnsins en Rannver H. Hannesson kom einnig að fyrirbyggjandi forvörslu og umpökkun bókverka á tímabilinu með aðstoð Safnaráðs.

Lærlingar:
(Lara Tzeo vann við uppsetningu og prentun á Catalouge Raisonné, aðstoðaði við undirbúning skráningar í Sarp 0.3 og sá um að vatnsmerkja ljósmyndir af verkum i safneign.( Alana Lorenzon vann við skráningu undir leiðsögn Karinu ásamt því að hjálpa til við uppsetningu á sýningu Grétars Reynissonar.
Stephanie Bokenföhr vann við skipulagninu veggspjaldasafns Nýló, auk þess sem hún kom að aðstoð uppsetningu við sýninguna Áratugur, sýningu Grétars Reynissonar. Hún vann við uppsetningu 6.bindið, sýningar Katrínar Ingu Jónsdóttur. Prófarkalas og braut um ritið sem gefið var út í tengslum við sýninguna.

Félagsmenn eru nú 322 talsins, 4 gengu í félagið frá síðasta aðalfundi.

Skipulagsskrá:
Við gerð breytinga á Skipulagsskrá Nýlistasafnsins vegna gildistöku nýrra Safnalaga þann 01.01.2013 og staðfestingu á henni hjá sýslumanninum á Sauðárkróki, sem fer með skipulagsskrár í umboði Innanríkisráðuneytisins, kom í ljós að skilgreiningar gagnvart lögum á sjálfeignarstofnunum hafa tekið breytingum í áranna rás og afmarkast eða skýrst þannig að ekki er lengur löglegt að hafa sjálfstæð félög innan sjálfseignarstofnana, eins og t.d. Félag Nýlistasafnsins.
Þetta kom í ljós vegna þess að við grúskuðum í því hvernig ætti að fá skipulagsskrá staðfesta hjá sýslumanni og birta í stjórnartíðindum eftir að aðalfundur samþykkti hana. Síðasta skipulagsskrá sem staðfest var og birt er sú upprunalega og því hefur ekki reynt á skránna gagnvart lögum síðan 1978. (Breytingar hafa verið gerðar og samþykktar á ársfundum árin 1986, 1990, 1992, 1994, 1995, 1996, 2005, 2007, 2010 og 2013. En aldrei birtar og staðfestar hvorki af þáverandi Dóms- og kirkjumálaráðuneyti né af sýslumanni Sauðárkróks).
Þetta þýðir að sjálfseignarstofnuninn Nýlistasafnið er í reynd ótengd félagasamtökum skv. lögum. Félag Nýlistasafnsins er hvergi til á skrá og þarf því að stofna, eða endurstofna til þess sérstaklega og veita því formlega umboð til að íhlutast með lög og kjósa í stjórnir sjálfseignarstofnunarinnar eins og hefð er fyrir.
Vegna þessa er tekin af dagskrá 6. dagskrárliður þessa fundar um skipulagsskrá. Það er í forgangi að fá skipulagsskrá sjálfseignastofnunarinnar samþykkta og birta skv. lögum um skipulagsskrár sjálfseignastofnanna og nýrra safnalaga í því skyni að hljóta viðurkenningu sem safn fyrir lögum og fyrir safnaráði. Lögmenn hjá Rétti, lögmannsstofu Ragnars Aðalsteinssonar og Björn Ingi lögmaður sem vinnur hjá sýslumanni munu áfram veita okkur ráð.

Útgefið efni:
Innanhússritið Catalogue Raisonné leit dagsins ljós á tímabilinu, það inniheldur myndir og upplýsingar um öll verk í safneign. Um er að ræða 19. binda uppflettirit með myndum og grunnupplýsingum um safneign Nýlistasafnsins. Ritið er þannig uppsett að það er hægt að færa inn leiðréttingar á því á árs grundvelli, eftir því sem safneignin vex og leiðréttingar berast um einstök verk. Einnig verður gefið út rit á ensku sem ber titilinn Arcive on the Run sem inniheldur vangaveltur um Nýlistasafnið og/eða sambærilegar stofnannir. Formlegur útgáfudagur þess í haust en við höldum uppá það núna. Ritið er í prentsmiðju þegar þetta er ritað, en dummy eru til sýnis á fundiunum. Báðar þessar útgáfur og málþing sem haldið var á síðasta stjórnartímabili eru hluti af verkefninu Uppspretta sem var styrkt af norrænu menningargáttinni KKnord. Verkefnið hófst árið 2009 og eru verklok nú í vor. 6.Bindið var gefið út í tengslum við samnefnda sýningu. Ritið verður gefið út í 3. hlutum á sýningartímabilinu. Fyrsti hluti er þegar komin út. Katrín Inga Jónsdóttir Hjördísardóttir Hirt og Gunnhildur Hauksdóttir leiða ritstjórn.

Sarpur 0.3.
Yfirfærsla skráningar úr Virtual Collection í Sarp 0.3 stendur sem hæst. Það er nú þegar búið að skrá 600 verk en þau verða um 1000 þegar starfstímabili Karinu lýkur. Ytri vefur Sarps verður opnaður almenningi í júlí á þessu ári. Þar verður hægt að nálgast upplýsingar um safneignir 50 safna á landinu, slóðinn er http://www.sarpur.is Safnasjóður hefur styrkt Nýló til áframhaldandi vinnu í skráningarverkefninu. Markmiðið er að sjálfsögðu að klára skráningu og ráða til þess starfsmann í stað Karinu þegar hún heldur utan til náms.

Rannsóknaraðilar, útlán og fræðsla:
Starfsfólk heldur áfram að sinna útlánum eins og endranær. Töluvert er um að fólk sitji á safninu, vinni verkefni og fái aðgang að heimildasöfnum okkar, ALRR og Gjörningaarkífi. Við höfum komið upp gestaaðstöðu í safninu og aðstoðum fólk eftir föngum. Catalogue Rasonné er liður í að þjónusta þessa aðila. Við tökum reglulega á móti hópum úr grunnskólum, menntaskólum og myndlistaskólum, hérlendum sem erlendum. Við veitum þeim leiðsagnir og tökum tíma til að spjalla við þá. Formaður stjórnar hélt fyrirlestur um Nýló fyrir Safnafræði í kúrsinum Faglegt starf safna. Þetta er í þriðja sinn sem formaður stjórnar heldur slíkan fyrirlestur.
Stjórn setti upp sýningu á lögfræðistofu Ragnars Aðalsteinssonar; Réttur við Klapparstíg, var þar um að ræða vinnuskipti því eins og gefur að skilja hefur Nýló ekki efni á lögfræðikostnaði í peningum talið.

Húsnæðismál:
Leigusamningur safnsins og Artíma rann út 1. apríl 2013. Stjórn hefur ekki tekið ákvörðun um það hvort samstarfið haldi áfram og verður sú ákvörðun í höndum nýrrar stjórar. Fjögurra ára leigusamningur Nýló við húsráðendur rennur út á þessu ári. Húsnæðismál Nýló eru til þess að gera ótrygg og í raun ótækt að safnið sé á almennum leigumarkaði. Nú er komið í ljós að eignarhaldsfélagið Rauðsvík hefur tekið við húsalengjunni við Skúlagötu af eignarhaldsfélaginu Vatn og Land. Rauðsvík ehf. heyrir undir Arion banka.

Samstarf:
Nýló er aðili að listahátíðinni Sequences og hefur átt í miklu samstarfi við stjórn hennar. Safnið hefur átt í samstarfi við LHÍ og HÍ á tímabilinu, auk þess að hafa tekið þátt í verkefnum í samstarfi við Live Art DK, í Kaupmannahöfn, Between Miracles í Center for Conteporery Art í Tblisi í Georgíu, Nordic Focus I á listahátíð í Kaupmannahöfn og Nordic Focus II í Malmö. Nýló átti í samstarfi við hollenska sýningarstjórann Henk Slager, sem leit dagsins ljós á þessu tímabili með sýningu og málþingi í LHÍ, og smiðju fyrir M.A. nema í LHÍ. Ýmis verkefni hafa haft aðgang að safninu til skrafs og ráðagerða má þar nefna Undir berum himni, Nýlókórinn og Artíma.

Gjafir:
Töluvert hefur borist af gjöfum til safnsins á tímabilinu, þ.á m. frá Jan Kaila (FI) og Clodagh Emo (IR). Stjórn mun taka formlega afstöðu til allra gjafa fyrir áramót og senda frá sér fréttir því tengdu ásamt áramótakveðju eins og gert hefur verið sl. tvö ár.

Fjármál:
Af fjármálum eru bæði góðar fréttir og slæmar. Góðu fréttirnar eru þær að safnið hlaut samstarfssamning til þriggja ára bæði við ríki og borg. Framlag Reykjavíkurborgar til safnins lækkaði þó en framlag frá ríki hélst hið sama. Samstarfssamningur var okkur töluvert baráttumál vegna þess að stjórn og starfsfólk eyddi dýrmætum tíma í þessar árlegu umsóknir. Nú er hægt að eyða sama tíma á þessu ári og næstu tveim í að finna aukið fjármagn annars staðar frá. Safnið hlaut auk þess stuðning frá Safnasjóði til þess að geta haft tímabundið áfram starfsmann í safneign. Félagsmennirnir G.erla, Rebekka Silvía Ragnarsdóttir og Ingunn Fjóla Ingþórsdóttir buðu sig fram á síðasta ársfundi til að aðstoða stjórn við að leiðrétta fjárhagshalla sem myndast hafði í flutningunum 2009/2010. Í framhaldi var pantaður fundur hjá aðstoðarmanni Mennta- og menningamálaráðherra. Þær lögðu á sig umtalsverða sjálfboðavinnu fyrir safnið og veittu ómetnalega hjálp við undirbúning fundarins. Í framhaldi fundar, sem var markviss og góður, var sótt til ráðuneytisins um stofnstyrk vegna flutninga, safnið hlaut þann styrk. Stjórn vill nota þetta tækifæri til að þakka þeim kærlega fyrir hjálpina.
Hitt er það að safnið stendur ekki sterkum fótum fjárhagslega. Það er svo sem ekkert nýtt. Ný stjórn mun þurfa á hugvitsemi að halda til að fjámagna dagskrágerð safnins ella getur hún átt á hættu að þurfa að draga mjög úr sýningardagskrá, þjónustu og aðstoð við listamenn sem sýna innan safnsins. Helst ber að nefna að það reynist sérstaklega snúið að fjármagna innlenda dagskrárgerð.  Auk þess skortir fjármagn til að hækka starfshlutfall starfsmanna sem vinna langt umfram vinnuskyldu sem endranær. Þá skortir fjármagn til að geta greitt starfsmanni safneignar laun til frambúðar. Safnar—áð hefur nú stutt safnið aftur á þessu ári til að ráða starfsmann tímabundið og klára ákveðin verkefni í safneign. Nú má þó ljóst vera að Nýlistsafnið þarf starfsmann til frambúðar til að hafa umsjón með safneign. Viðurkenning frá safnaráði er mikilvæg í þessu samhengi vegna aðgengi að styrkjum úr safnasjóði. Að lokum má má einnig gera ráð fyrir því að leigan hækki í haust.
Framkvæmdarstjóri, Gunndís Ýr Finnbogadóttir mun kynna ársreikninga og fjárhagsáætlun hér á eftir.

Ytri starfsemi safnsins á tímabilinu – sýningar og viðburðir opnir almenningi

Volumes for Sound sýning bandaríska tvíeykisins Dubbin og Davidsson stóð yfir þegar síðasti Aðalfundur átti sér stað.

Geirþrúður Finnbogadóttir kynnti bókverkið Mindgames 11. júlí.

Samtal um Tímalínu í Listasafni Íslands átti sér stað 25. Ágúst, Nýló og Listasafn Íslands stóðu fyrir opnu samtali um frumkvæði listamanna í reykvísku listalífi frá árinum 1962 til 2012. Gunnhildur Hauksdóttir, Unnar Örn Auðarsson, Sigríður Melrós og Karina Hanney Marrero tóku til máls en sú síðast nefnda vann markvisst að því að safna upplýsingum í ARLLR og byggja upp tímalínu sem stjórn lét gera í Listasafni Íslands á meðan á Listahátíð 2012 stóð. Samtalið markaði endalok sýningarinnar sem Nýló setti upp í LÍ á Listahátíð.

Viðkvæmur Farangur II Níels Hafsteinn opnaði einkasýningu 28. september á síðasta ári.

24. & 26. ágúst 2012 stóðu Jón Atli Jónasson, Jón Páll Eyjólfsson, Aude Busson og Bryndís Björgvinsdóttir fyrir frumsýningu verksins Mindgroup á  í safninu. Verkið var hluti af LÓKAL – alþjóðleg leiklistarhátíð í Reykjavík.

SKÁLAR – 25. ágúst voru haldnir tónleikar og kynning á hljóðlist á vegum Skála, Miðstöðvar fyrir hljóðlsit og tilraunakennda tónlist.

Listahátíð í Kaupmannahöfn Nordic Focus I þann 1. september. Gunnhildur Hauksdóttir hélt tölu og tók þátt í samtali og sem seinna er gefið út á bók á vegum Den Frie, í Kaupmannahöfn. Samtalið snérist um Listamannarekin sýningarrými en áhersla var á frumkvæði listamanna og samstarf listamanna á listahátíð í Kaupmannahöfn á síðasta ári.

Sýning tvíeykisins Angeli Novi, Þú getur ekki staðið í vegi fyrir framförum opnaði 29. september og lauk 2. desember. Umræður og leiðsögn fóru fram á meðan á sýningu stóð. Angeli Novi eru Steinunn Gunnlaugstóttir og Ólafur Páll Sigðurðsson.

Gjörningadagsrká sem bar titilinn Sounds for Soloists átti sér stað þann 11. september í sýningastjórn Solveij Helweg Ovesen. Sounds for Soloists ferðaðist frá Grim Museum í Berlín til okkar og fór þaðan til Signal í Malmö. Listamennirnir sem komu fram í Nýló voru Anders Lauge Meldgraad, Ingi Garðar Erlendsson, a rawlings og Cia Rinne.

Þann 14. nóvember tók Gunnhildur Hauksdóttir þátt í samtali fyrir hönd Nýló í Nikolaj kirkju í Kaupmannahöfn á vegum Nordiske Samtalekokkener í samstarfi við Live Art DK um Gjörningaarkíf safnsins og gjörningatengd verkefni.

Orðið – tólf nemendur frá LHÍ opnuðu þann 6. desember sýningu sem stóð yfir eina helgi. Nemendurnir voru Grétar Mar Sigurðsson, Indriði Arnar Ingólfsson, Andreas Jari Juhani Toriseva, Helena Aðalsteinsdóttir, Logi Leó Gunnarsson, Þröstur Valgarðsson, Arnljótur Sigurðsson, Karl Torsten, Myrra Leifsdóttir, Sigrún Hlín Sigurðardóttir, Óskar Kristinn Vignisson og Borghildur Tumadóttir. Hekla Dögg Jónsdóttir leiddi námskeiðið en Sigurður Guðjónsson, Eric Wolf, Jóní Jónsdóttir, Monika Frycova, Ragnheiður Gestsdóttir, Sara Björnsdóttir, Cliff Eyland, Rod Summers og Gunnhildur Hauksdóttir komu einnig að kennslunni.

Fyrsta sýning á nýju ári var Dómgreindin er Spegill sem opnaði 19. Janúar og stóð fram í mars . Málþing í LHÍ fylgdi sýningunni daginn fyrir opnun. Ólöf Gerður Sigfúsdóttir var tengiliður verkefnisis. Verkefnið var stutt af Frame Visual Art Finland og Modriaan Fund. Tiong Ang, Roger Palmer, Jan Kaila, Japo Knuutila, Clodagh Emoe og Mick Wilson sýndu verk sín í sýningarstjórn Henk Slager. Safnanótt bar upp á sýningartímanum. Safnið var opið fram eftir og stjórn tók á móti gestum. Catalouge Raisonné var þá forkynnt í fyrsta sinn enda var þá prentun nýlokið.

Verkefnið Between Miracles sem var sett upp í CCAT í Tblisi í Georgíu samanstóð af sýningu og tveggja daga málþingi um frumkvæði listamanna og styrktarsjóði. Formaður stjórnar hélt tölu og tók þátt í umræðunum. Málþingið var haldið dagana 8. og 9. mars.

Tiong Ang heimsótti safnið aftur og 16. mars var hann með spjall um verk sitt á sýningunni Dómgreindin er Spegill, sem var opið almenningi. Dagana 19. - 21. mars hélt hann, ásamt kvikmyndagerðar- og myndlistamanninum Alejandro Ramirez, smiðju eða workshop í safneignargeymslunni. Þeir unnu með meistaranemum í myndlist við Listaháskóla Íslands og ýmsum aðilum sem sýndu smiðjunni áhuga.

Grétar Reynisson var heiðurslistamaður Sequences í ár. Opnun sýningar hans Áratugur þann 5. apríl var ein sú fjölsóttasta sem við munum eftir.

16. apríl stóð Félag Listfræðinga fyrir málfundi í safninu þar sem fulltrúar allra stjórnmálaflokka tjáðu sig um málefni myndlistar

Á kjördag 27. apríl sýndi Steinunn Gunnlaugsdóttir mynbandsverkið Lýðræðið er pulsa. Frumsýning verksins var á kjördag fyrir fjórum árum en Steinun hyggst sýna verkið í endurskoðuðum myndum á kjördag um ókomna tíð. Að þessu sinni sýndi hún það í Nýló.

Gjörningur eftir Olgu Kisselevu, Power Struggle eða Valdabarátta, var fluttur 2. maí. Olga vann verkið með Silju Báru Ómarsdóttur, stjórmálafræðingi, Stefáni Pálssyni, sagnfræðingi, Sólveigu Ólafsdóttur, framkvæmdastjóra Reykjavíkurakademíunnar, og Gylfa Magnússyni, dósent í viðskiptafræði við Háskóla Íslands. Hugbúnaður í verkinu er eftir Oleg Kisele. Gjörningurinn var í Nýló í samvinnu við Margréti Elísabetu, Lorna Lab og H.Í.

Sýningin 24 Spaces (24 Rými) er verkefni Jacobs Fabricius fráfarandi sýningarstjóra Malmö Konsthall. Til þátttöku í verkefninu var boðið listamannareknum rýmum á Norðurlöndum, Verkefnið leitaðist við að skoða vægi þeirra í menningarumhverfi svæðisins. Nýlistasafnið sýndi verk eftir Charles Gaines (Bandaríkin, 1944), Hans Rosenström (Svíþjóð/Finnland, 1979), Deirdre M. Donoghue (Írland/Finnland, 1971) ásamt fjölmörgum bókverkum eftir félagsmenn Nýló. Verkefninu var stýrt af Gunndísi Ýr Finnbogadóttur og Bjarka Bragasyni og voru verk eftir þau á sýningunni, sem hluti af samtali um ferli sýningarinnar.

6. bindið er sú sýning sem stendur yfir í safninu þegar þetta er ritað. Hún er einkasýning Katrínar Ingu Jónsdóttir Hjördísardóttir Hirt, unnin í samstarfi við stjórn og er Gunnhildur Hauksdóttir sýningarstjóri. Hún opnaði 18. maí en verður endurskoðuð fjórum sinnum út sýningartímabilið, henni líkur í ágúst og fylgir útgáfa í þrem hlutum. Fyrsti hluti er þegar komin út.

Fh. Stjórnar,(Gunnhildur Hauksdóttir

Skýrslu lýkur

Nýlistasafninu barst töluvert af verkum á árinu 2012, mest óx bókverkasafnið, en einnig bárust bækur í bókasafnið og gögn í heimildasöfnin, hér fer upptalning á því helsta sem borist hefur.

Verk í Safneign:

Melissa Dubbin & Aaron S. Davidson gáfu ljósmynd frá árinu 2012; Smokescreen (Entrainment Study 8) og tvö bókverk, annað frá 2008; Fallen Books og hitt frá árinu 2011; You Love Me Truly.

Tígurinn og Ísbjörninn. Skúlptúrar, sjálfsmyndir af listamönnunum í formi brúða. Tígurinn og Ísbjörnin voru Bjargey Ólafsdóttir, Unnar Örn Jónsson, Gunnhildur Hauksdóttir og Ragnar Kjartansson. Brúðurnar voru hluti af sýningu hópsins sem bar titilinn Sænska sýningin og var í Gallerí 21 í Malmö árið 2003.

Myriam Bat Yosef gaf tvo eldri skúlptúra, Hönd og Sími (ártöl óþekkt) og nokkrar teikningar frá árinu 2012.

Valgarður Bragason gaf málverk Án titils frá árinu 2011.

Níels Hafstein gaf nokkur bókverk eftir sjálfan sig; Eldflaugar frá árinu 1993, Uppskurður II / Operation II frá árinu 1993, Þrenna / Three of a kind frá árinu 1991, Uppskurður I / Operation I frá árinu 1993, Uppskurður III / Operation III frá árinu 1993, Kjölur / Spine frá árinu 1991, 3B frá árinu 1993 og einn skúlptúr; Könnun / Exploration frá árinu 1991.

Magnús Pálsson gaf bókverk í blandaðri tækni sem ber titilinn Mumbling Eye, Nýló átti eitt eintak fyrir.

Ásta Ólafsdóttir kom færandi hendi og gaf safninu töluvert af bókverkum eftir ýmsa höfunda. Hér fer upptalning á bókverkum sem Ásta gaf:
F. Magrangeas, bókverk, höfundur Ásta Ólafsdóttir. Gefið út af Boekie Woekie ártal og upplag óþekkt.
Pegasus Helvítis Merin, bókverk, höfundur Helgi Þorgils Friðjónsson. 1983-1985, upplag 85/100.
STAR, bókverk, höfundur Helgi Þorgils Friðjónsson. 1985, upplag 44/69.
Hundrað fyrirburðir, bókverk, höfundur Þorvaldur Þorsteinsson. 1987, upplag 79/200.
What is this, bókverk Elias Hjörleifsson unnið árið 2001 í samvinnu við Ólaf Elíasson. Upplag 300.
Jan Dibbets, bókverk eftir Robin Redbreast´s Territory / Sculpture 1969 - kom út árið 1970.
Vor ljóð, bókverk eftir Svölu Sigurleifsdóttur frá árinu 1976.
KÍM, bókverk eða fjölfeldi eftir Kristinn G. Harðarson frá árinu 1981.
Litlu bækurnar, bókverk eftir Ástu Ólafsdóttur frá árinu 1983, upplag 200.
Eilífir sólargeislar, bókverk eftir Kristinn G. Harðarson frá árinu 1986, upplag 68/300.
Ofrím, bókverk eftir Sigurð Guðmundsson frá árinu 1972, upplag 300.
Hugsað um tréhest, bókverk eftir Nini Tang frá árinu 1986.
Af viðskiptum mínum við Eppelein von Gailingen, bókverk eftir Helga Þorgils Friðjónsson frá árinu 1985.
Chicken with Madness, bókverk eftir Donald Gardner frá árinu 1988.
Nokkrir íslenskir sjávarfuglar, bókverk eftir Ingólf Örn Arnarson frá árinu 1979, upplag 19/50. Nýló á eitt eintak fyrir.
Conversation Drawings, bókverk eftir Guðrúnu Hrönn Ragnarsdóttur frá árinu 1981, upplag 29/100. Nýló á eitt eintak fyrir.
Hundar och Änglar / Dogs and Angels, bókverk eftir Helga Þorgils Friðjónsson frá árinu 1986. Nýló á eitt eintak fyrir.
Sex bækur, bókverk eftir Kees Visser frá árinu 1984. Nýló á eitt eintak fyrir.


Bóka- og heimildasöfn:

Nýló fær árlega sent töluvert af bókum og sýningarskrám frá ýmsum stofnunum og samstarfsaðilum, þær eru of margar til að telja upp hér. Franz Graf gaf safninu veglega bók með eigin verkum og Hermann Nitsch gaf safninu yfirgripsmikla bók um Wiener Aktionismus stefnuna og þróun hennar. Ásta Ólafs gaf safninu líka töluvert efni og hér fer upptalning á því helsta;
Nature -> <- Art, Sýningarskrá frá Feneyjartvíæringi 1978.
ART WORKS eftir Þorvald Þorsteinsson, sýningarskrá frá árinu 1998.
Smámunir, sýningarskrá gefin út árið 1978 í tilefni af sýningu á Kjarvalstöðum með verkum eftir Magnús Tómasson frá árunum 1967-1972.
Building Natural History, Sýningarskrá með verkum Kevin Kelly frá árinu 1995.
Sýningarskrá frá 1981-1982 með verkum Enzo Cucchi.
Þögn, teikningar og grafík. Edda Jónsdóttir, sýningarskrá frá árinu 1981.
Islandia, Tampere-Talo, Tampere, sýningaskrá frá árinu 1990 með verkum Guðrúnar Hrannar Ragnarsdóttur.
Samvinnuverk / Samsýning, sýningarskrá og boðskort á sýningu í Norrænahúsinu frá árinu 1977 með verkum eftir Helga Þorgils, Ólafs Lárussonar, Henriette Van Egten, Johannes Geuer, Tom Wasmuth, Jan Voss ofl.
Fragmente, sýningarskrá í upplagi 1000 frá árinu 1980 með verkum Dorothee van Windheim.
Konst og undervisningskons, rit frá árinu 1986 með fyrirlestri eftir Magnús Pálsson.
Die Young or Risk Graceful Old Age, Tímarit með framlagi frá Ástu Ólafs, Þór Elís Pálssyni, Steinari Sigurjónssyni og fleirum frá árinu 1991.

Einnig bárust heimildir um gjörninga í gjörningaarkífið og töluvert af nýjum heimildum barst í arkíf um listamannarekin rými á árinu. 

ÁRSFUNDUR 28. JÚNÍ 2012

Á ársfundi 2012 voru þrír félagsmenn gerðir að  heiðursfélagum í Nýlistasafninu. Þeir eru Ásta Ólafsdóttir, Guðrún Erla Geirsdóttir og Hildur Hákonardóttir. Fyrir eru heiðursfélagar þeir: Hörður Ágústsson, Douwe Jan Bakker og Dieter Roth, frá ársfundinum árið 1992; Hreinn Friðfinnsson, Kristján Guðmundsson og Sigurður Guðmundsson árið1994; Magnús Pálsson og Níels Hafstein árið1995 og Rúrí árið 2011.

Lesin var skýrsla stjórnar, ársuppgjör og fjárhagsáætlun voru kynnt, auk þess sem væntanlegar útgáfur voru kynntar og nýprentað kynningarefni safnsins og styrktarsíða.

FRÁFARANDI STJÓRN VAR:
Gunnhildur Hauksdóttir (formaður stjórnar)
Indíana Auðunsdóttir (varaformaður stjórnar)
Bjarki Bragason (ritari stjórnar)
Hjalti Þorkelsson (gjaldkeri stjórnar)
Guðni Gunnarsson (meðstjórnandi)

TIL VARA:
Ólöf Gerður Sigfúsdóttir
Gunnar Helgi Guðjónsson
Tinna Guðmundsdóttir

NÝ STJÓRN VAR KJÖRIN:
Gunnhildur Hauksdóttir (formaður stjórnar)
Indíana Auðunsdóttir (varaformaður stjórnar)
Gunndís Ýr Finnbogadóttir (ritari stjórnar)
Hjalti Þorkelsson (gjaldkeri stjórnar)
Guðni Gunnarsson (meðstjórnandi)

TIL VARA:
Ólöf Gerður Sigfúsdóttir
Karina Hanney
Bjarki Bragason

HÉR Á EFTIR FER SKÝRSLA STJÓRNAR FYRIR STJÓRNARSETU
Á TÍMABILINU 5.JÚNÍ 2011 - 28. JÚNÍ 2012:

FASTIR STARFSMENN SAFNSINS Á TÍMABILINU VORU:
Gunnhildur Hauksdóttir (safnstjóri, 80% starfshlutfall)
Ingunn Fjóla Ingþórsdóttir (framkvæmdastjóri, 60% starfshlutfall, lét af störfum 1. apríl)
Ingunn Fjóla tók tímabundið við starfi safnstjóra í tvo mánuði í apríl og maí á meðan formaður stjórnar fór í tveggja mánaða leyfi.
Marta María Jónsdóttir (tók við stöðu framkvæmdastjóra 1. apríl, 60% starfshlutfall)

STARFSMENN Í SÉRSTÖKUM VERKEFNUM:
Unnar Örn Jónasson Auðarson og Auður Aðalsteinsdóttir unnu að verkefninu Uppspretta. Unnar er í ritstjórn rits sem gefið verður út vegna verkefnisins og Auður Aðalsteinsdóttir hefur umsjón með útgáfu.
Jeannette Castioni starfaði að fyrirbyggjandi forvörslu verka úr safneign.
Ármann Agnarsson og Högni Valsson hanna allt efni fyrir safnið og hafa umsjón með útliti þess sem safnið sendir frá sér.
Kristjana Rós var ráðin sýningarstjóri Grasrótar IX og Ransú var ráðinn sýningarstjóri sýningarinnar Læsi.
Indíanna Auðunsdóttir vann í átaksverkefni í samstarfi viðVinnumálastofnun við skipulagningu safneignar. Hún merkti hillur og færði réttar staðsetningar verka í geymslu inn í Virtual Collection (VC) gagnagrunninn og gerði heildrænt skipulag safneignar geymslu.
Ingunn Fjóla Ingþórsdóttir er ráðin tímabundinn starfsmaður safneignar, hún hefur umsjón með færslu gagna úr núverandi safneignarskrá í VC yfir í samræmdan gagnagrunn: Sarpur 0.3. Styrkur fékkst frá Safnasjóði til verksins. Markmiðið er að Ingunn verði ráðin til frambúðar sem starfsmaður safneignar í 30% starfshlutfall. Hún hefur verið í vinnu í júní við undirbúningsstörf en í september hefst vinna hennar að fullu.
Tilfallandi prófarkalestrar og þýðingar voru auk þess unnar af ýmsum aðilum.
Stjórnarliðar hafa einnig fengið greitt fyrir uppsetningu sýninga og niðurtöku eftir föngum, þó mest hafi verið unnið í sjálfboðavinnu.

LÆRLINGAR:
Tanja Wiehn yfirfór skráningu á bókverkum og leiðrétti, yfirfór skúffur með tvívíðum verkum, leiðrétti villur í skráningu. Hún vann einnig að ritgerð um Dieter Roth og kom aftur til landsins vegna þeirrar vinnu og fékk þá vinnuaðstöðu í safninu.
Verena Faisst fór í gegnum ljósmyndasafn safneignar, skipulagði það, bjó til .jpg og .tiff úr .raw skjölum og endurskýrði ljósmyndirnar í samræmi við gagnagrunninn. Þetta var liður í undirbúningi gerðar Catalogue Rasonné safneignar sem nánar er fjallað um síðar í skýrslunni. Verena var einnig ötull ljósmyndari og hönnuður fyrir safnið.
Anna Lena Artis tók við af Verenu og hóf störf við að setja upp Catalogue Rasonné. Hún vann einnig við að prófarkalesa enska texta fyrir safnið.
Jennifer Gottstein tók við af Önnu Lenu og vann við uppsetningu á Catalogue Rasonné.

FÉLAGSMENN:
Félagsmenn eru nú 318 talsins.
Þrettán gengu í félagið frá síðasta aðalfundi.

INNRI STARFSEMI SAFNSINS Á TÍMABILINU – SAFNEIGN OG FRAMKVÆMDIR

Auka félagsfundur
Umræðufundur var haldin vegna sýningarinnar Koddu sem var síðasta sýning í safninu á seinasta stjórnartímabili. Fundurinn var tilraun til að gera upp þá atburði sem áttu sér stað í safninu þegar verk var fjarlægt af sýningu. Öllum félagsmönnum var boðið.

Uppspretta / Archive on the Run
Verkefnið Uppspretta er í fullum gangi. Sýningarstjórnunum Kim Einarsson hjá Konsthall C, Elenu Tzotzi hjá Signal og Tone Hanson hjá Heine Onstad var boðið til landsins. Haldar voru umræður í Listaháskóla Íslands í vor með völdum gestum þar sem gerð var tilraun til að skilgreina eða endurskilgreina Nýlistasafnið og margþætt hlutverk þess sem safn, félagasamtök og sýningarvettvangur. Ákveðið var að upp úr þessum fundum og vangaveltum yrðu gefin út tvö rit:
Innanhússritið Catalogue Rasonné sem inniheldur myndir og upplýsingar um öll verk í safneign. Þetta rit verður 20 binda uppflettirit með myndum og grunnupplýsingum um safneign Nýlistasafnsins.
Einnig verður gefið út rit sem inniheldur texta um Nýlistasafnið, skilgreiningar og tillögur um starfsemina. Auður Aðalsteinsdóttir mun hafa umsjón með útgáfunni en ritstjórn skipa: Gunnhildur Hauksdóttir, Gunndís Ýr Finnbogadóttir, Ármann Agnarsson og Unnar Örn Jónasson Auðarson. Verkefnið Uppspretta var styrkt af norrænu menningargáttinni KKnord. Verkefnið hófst árið 2009 og eru áætluð verklok með útgáfum nú í haust.

Arkíf um listamannarekin rými
Karina Hanney var fengin til að innkalla frekari heimildir, endurskrá SÚM í arkífið og vinna að tímalínu, nokkurs konar mindmap yfir sögu listamannarekna rýma frá og með Súm og til okkar dags. Hún fékk Rannís styrk til verksins og verkefnið varð liður í Listahátíð í Reykjavík í samstarfi við Listasafn Íslands og Háskóla Íslands. Karina er um þessar mundir með skrifstofu á Listasafni Íslands þar sem hún vinnur við verkefnið og innkallar heimildir.

Arkíf um listamannarekin rými – kvennarými
Áslaug Einarsdóttir var fengin til að gera greiningu á sögu listamannarekinna rýma (lrr) sem stofnuð og rekin hafa verið af konum. Hún ritaði grein í umboði Nýlistasafnsins. Rannsóknin var styrkt af Hlaðvarpanum. Greinin birtist í nýjasta tölublaði Endemi og verður hluti af heimildarsafni safnsins um lrr.

Forvarsla
Jeannette Castioni var eins og áður sagði lausráðin sem forvörður Nýlistasafnsins. Við komum upp aðstöðu fyrir hana og settum hana inn í þau verk sem þörf er á að vinna að í forvörslu og fyrirbyggjandi forvörslu.
Safnasjóður hefur styrkt Nýló til verksins. Sjá nánar hér

Rannsóknaraðilar og útlán
Töluvert var um útlán á verkum úr safneign á tímabilinu, m.a. til Listaháskólans, Listasafns Reykjavíkur, Listasafns Íslands, Listasafns Árnesinga, til i8 og til Berlínar; Kuckei+Kuckei. Þessu fylgir töluverð umsýsla. Stjórnin hefur ákveðið að innleiða umsýslugjald vegna útlána og verður það nokkurn veginn í samræmi við umsýslugjald annarra safna: 3000 kr. pr. item úr safneign bókverka; 4000 kr. pr. item úr safneign verka og 1000 kr. pr. item úr heimildasöfnum. Auk þess skal kostnaður vegna útlána falla á lántaka. Þá er um að ræða tryggingarkostnað; einnig sendingar- og pökkunarkostnað ef um það er að ræða.

Töluvert er um að nemar, fólk sem er að vinna að skráningu á listasögu og/eða aðrir áhugasamir komi og sitji á safninu og vinni verkefni og fái aðgang að arkífunum ALRR og Gjörningaarkífi. Við veitum þessu fólki aðstöðu annað hvort inni í safneign, þar sem við höfum komið upp „skrifstofuaðstöðu“, eða á skrifstofunni hjá okkur og aðstoðum það eftir föngum. Þessi aðsókn eykst jafnt og þétt og við sjáum mikla þörf fyrir að koma upp gestaaðstöðu fyrir fólk sem vinnur við rannsóknir. Catalogue Rasonné er liður í að þjónusta þessa aðila.

Húsnæðismál
Nýlistasafnið átti forleigurétt að því 111 fermetra rými sem hér er fyrir innan, sem áður tilheyrði Reykjavík Art Gallerí. Nýló nýtti sér forleiguréttinn og hefur því til umráða 666 fermetra og framleigir Artíma Gallerí umrædda 111 fermetra. Artíma er rekið af nemendafélagi innan HÍ. Artíma nýtir rýmið undir sína starfsemi sem er aðskilin starfsemi Nýlistasafnsins.

Leigusamningur safnsins rennur út 1. apríl 2013. Þá verður leigusamningur endurskoðaður og gera má ráð fyrir að leigan hækki.
 
Samstarf við Artíma
Artíma er gallerí sem stofnað og rekið er af nemendum Háskóla Íslands. Markmið gallerísins er að vinna sýningastýrðar myndlistarsýningar. Miklir möguleikar á rannsóknum liggja í safneign Nýlistasafnsins fyrir listfræðinema en ekki sér fyrir endann á því í hvaða formi samstarfið verður.

Annað samstarf
Nýló var aðili að Listahátíð í Reykjavík í ár og sem endranær er Nýló aðili að listahátíðinni Sequences. Safnið hefur einnig átt í samstarfi LÍ, LHÍ, HÍ, LR og RÚV o.fl. innlendar stofnanir á tímabilinu, auk þess að vera í samstarfi við Heine Onstad í Noregi, Signal og Kunsthalle C í Svíþjóð. Einnig á Nýló í samstarfi við hollenska sýningarstjórann Henk Slager, mun það líta dagsins ljós á næsta ári. Nýló átti líka í samstarfi við Endemi, m.a. með því að standa fyrir greinarskrifum í blaðið og koma á tengslum Endemi við HÍ vegna sýningar á Háskólatorgi. Nýló studdi einnig við bakið á útgáfu bókaflokksins Meðgönguljóð.

Gjafir
Töluvert hefur borist af gjöfum til safnsins á tímabilinu, m.a. frá Valgarði Bragasyni, Myriam Bat Yosef, Dubin og Davidsson, Ástu Ólafsdóttur, Níels Hafstein o.fl. en stjórn mun taka formlega afstöðu til allra gjafa fyrir áramót, útbúa gjafabréf og senda þá frá sér fréttir þar að lútandi eins og gert var um seinustu áramót.

Fjármál
Fráfarandi framkvæmdastjóri, Ingunn Fjóla Ingþórsdóttir, ásamt nýráðnum framkvæmdastjóra, Mörtu Maríu Jónsdóttur, kynntu ársreikninga og fjárhagsáætlun á ársfundi. Helst ber að nefna að sérstaklega snúið reynist að fjármagna innlenda dagskrárgerð en samfara vexti safnsins og víkkandi ábyrgðarsviði hallar mjög á starfsfólk.
Tilfinnanlega vantar fjármagn til að hækka prósentu launa starfsmanna og fjármagn til að geta greitt starfsmanni safneignar laun til frambúðar. Einnig eru húsnæðismál í nokkurri óvissu því húsaleigusamningur rennur út á næsta ári. Stjórn lét gera flipa á heimasíðu safnsins þar sem fólki er boðið að styrkja safnið með framlögum, styrktarferlið er enn í vinnslu en flipinn á heimasíðunni er kominn í gagnið. Þar geta einkaaðilar styrkt safnið í gegnum Valitor á Íslandi. Sjá nánar hér

YTRI STARFSEMI SAFNSINS Á TÍMABILINU – SÝNINGAR OG VIÐBURÐIR OPNIR ALMENNINGI

Nýlókórinn hélt vortónleika 16. maí. Þar voru flutt verk eftir Hörð Bragason, Magnús Pálsson og Sigtrygg Berg Sigmarsson.

Carl Boutard byrjaði síðasta sýningartímabil með einkasýningu í safninu frá 28. maí - 3. júlí. Hann hélt listamannaspjall og var með leiðsögn.

Læsi , 16. júlí – 11. september, var sýning úr safneign með áherslu á bókverk.  Ransú stýrði sýningunni sem samanstóð af verkum eftir Áslaugu Thorlacius, Birgi Andrésson, Dieter Roth, Douwe Jan Bakker, Finnboga Pétursson, Franz Graf, Friðrik Þór Friðriksson, Hildi Hákonardóttur, GErlu, Gunndísi Ýr Finnbogadóttur, Hlyn Hallsson, Jan Voss, Kristjáni Guðmundssyni, Níels Hafstein, Ragnhildi Jóhannsdóttur, Rúnu Þorkelsdóttur, Rúrí og Steingrím Eyfjörð. Gjörningar Gunndísar Ýr voru í safninu á meðan á sýningu stóð. Menningarnótt bar upp á sýningartíma  Læsis, Rannsú hélttvær leiðsagnir; Katrín Inga Jónsdóttir, Ragnhildur Jóhannsdóttir, Jepp hópurinn, Angela Rawling og Ciara Adams fluttu gjörninga; Evil Madness spilaði undir bendulestri Bjarna Þórarinssonar.

Momentum Episodes átti sér stað 14. september þegar Roi Vaara og Magnús Logi Kristinsson fluttu gjörninga í safninu í sýningarstjórn Markúsar Þórs Andréssonar. Gjörningurinn var hluti af dagskrá Moss tvíæringsins í Noregi og hluti af gjörningaferðalagi þeirra Roi og Magnúsar um borgir Norðurlanda.

Grasrót IX var haldin í sýningarstjórn Kristjönu Rósar Guðjohnsen. Sýningarskrá var gerð í tilefni sýningarinnar og  var sett saman í safninu og gefin út í 300 árituðum eintökum. Davíð Kristinsson heimspekingur var fenginn til að rita hugleiðingar um Grasrót í sýningarskrá. Bryndís Björnsdóttir, Helga Björg Gylfadóttir, Irene Ósk Bermudez, Klængur Gunnarsson, Kolbrún Ýr Einarsdóttir, Kristín Rúnarsdóttir, Sigríður Tulinius og Sigurður Atli Sigurðsson sýndu á Grasrót IX; þau voru valin úr hópi umsækjenda af nefnd sem stjórn skipaði á seinasta stjórnartímabili. Tveir gjörningar voru fluttir á sýningartímabilinu og leiðsagnir voru haldnar.

Sjöunda Alþjóðlega ljóðahátíðin (áður Nýhil) var haldin í Nýló og Norræna húsinu dagana 6 -8. október, þar sem fjölmargir höfundar og listamenn komu fram.

Litli föstudagur var einkasýning Helga Þórssonar í safninu sem stóð út árið 2011. Helgi stóð fyrir jólabasar Kæmpe JULEBAZAR þar sem fjöldi listamanna sýndu og seldu verk sín. Á jólabasarnum voru upplestrar og uppákomur.

Bandaríski listamaðurinn I´d M Thfft Able flutti hljóðverk í safninu 11. desember ásamt Auxpan og AMFJ.

Nýlókórinn hélt áramótatónleika 11. janúar. Þar voru flutt tvö verk eftir Kristinn G. Harðarson og eitt verk eftir Guðmund Vignisson og Sigtrygg Baldursson.

Sýningin Teikn , sem styrkt var af Hlaðvarpanum, opnaði 24. janúar þar sem Myriam Bat-Yosef og Jóhanna Kristbjörg Sigurðardóttir sýndu. Jóhanna flutti gjörning á opnun, Jóhanna og Markús Þór Andréssson, sem ritaði texta í sýningarskrá, voru með listamannaspjall og Myriam hélt tvo fyrirlestra, annan í LHÍ og hinn í Nýló. Safnanótt bar upp á sýningartíma og safnið var opið til miðnættis með leiðsögnum stjórnarliða.

Armory 2012
Nýló var styrkt af utanríkisráðuneytinu og kynningarmiðstöðinni til farar á Armory sýninguna í New York borg. Þrír stjórnarliðar héldu utan, Gunnhildur, Indíana og Bjarki. Nýló deildi bás með danskri stofnun, Overgaden, sem í sameiningu stóðu að gjörningadagskrá í básnum á Armory. Básinn var hluti af Non-Profit básum sem Armory býður sérstaklega og var hluti af Nordic Focus sem var stýrt af Jacob Fabricius þetta árið. Nýló lét prenta bæklinga um starfsemina og nafnspjöld, sýndi svipmyndir úr sögu safnsins á skjá í básnum og kynnti bókina Nýlistasafnið 1978-2008 sérstaklega. Bókin fór í þó nokkra dreifingu;Sculpture Center og New Museum tóku eintök í sölu.

Fjölskylduskemmtun , sýning Curvers Thoroddsen, opnaði 22. mars og fjöldi skemmtikrafta og listamanna komu fram sem hluti af sýningunni og stóð hún til 29. apríl. Barnamenningarhátíð Reykjavíkur átti stað á sýningartímabilinu og Nýló var því aðili að Barnamenningarhátíðinni í ár.

Volumes for sound opnaði í safninu þann 19. maí. Bandarísku listamennirnir Melissa Dubbin og Aaron S. Davidsson sýndu innsetningu, skúlptúra, ljósmyndir og myndbandsverk. Sýningin var hluti af Listahátíð í Reykjavík. Í tengslum við sýninguna stóð stjórn í samvinnu við Elvar Kjartansson fyrir hljóðverkadagskrá en þar var listamönnum boðið að nota skúlptúrana sem hljóðrásir fyrir verk sín. Listamenn sem fram komu voru Auxpan, AMFJ, Stefán Finnboga Pétursson, Slátur, Trouble og Stilluppsteypa. Auk þess sem þau sjálf fluttu verk á opnun í samvinnu við tónlistarmanninn Shawn Onsgard.

Dagar undrabarnsins eru á enda var gjörningur fluttur í safninu 25. og 27. júní. Gjörningurinn er samstarfsverkefni fimm listamanna: Anat Eisenberg, Bergþóru Snæbjörnsdóttur, Rakel McMahon, Sögu Sigurðardóttur og Yair Vardi.

Þann 11. júlí kynnti Geirþrúður Finnbogadóttir Hjörvar bókverk sitt Mindgames í safninu. Hún hélt fyrirlestur um hugmyndirnar sem liggja að baki verkinu og lesið var upp úr því.

Sýning Níelsar Hafstein, Viðkvæmur farangur II , opnaði þann 28. júlí. Viðkvæmur farangur II er safneignarsýning Nýló þetta árið. Sýningin er einkasýning Níelsar Hafstein og færir listamaðurinn safninu gjöf verka við þetta tækifæri. Dr. Hlynur Helgason ritar texta í sýningarskrá og heldur tvo fyrirlestra um myndlistarmanninn og feril hans, í safninu og í fyrirlestrarsal Aríon banka. Níels valdi verk úr safneign til sýningar, fékk verk að láni frá Listasafni Íslands og Listasafni Reykjavíkur og sýnir einnig ný verk. Sýningin stendur til 9. september 2012.

Síðustu tvær sýningar ársins 2012 verða annars vegar samsýning Steinunnar Gunnlaugsdóttur og Ólafs Páls Sigurðssonar með verk sem gengur undir heitinu Þú getur ekki staðið í veginum fyrir framförum og hins vegar 6. bindið, einkasýning Katrínar Ingu Hjördísardóttur.

Skýrslu lýkur

Nýlistasafninu bárust fjölmargar gjafir á árinu 2011. Söfnunarstefna safnsins felur í sér að biðja einn listamann á ári um að færa safninu verk. Á þessu ári var það Helgi Þórsson. Safninu bárust auk þess fjölmörg önnur verk, heimildir og bækur. Stjórn safnsins áskilur sér rétt til að hafna eða þiggja gjafir að vild. Hér fyrir neðan má sjá upplýsingar um verk eða heimildir sem samþykkt voru í safneign og heimildarsafn safnsins. Nýlistasafnið kann öllum gefendum bestur þakkir fyrir.  

Listaverk í safneign: 

Helgi Þórsson
Litli Föstudagur, Baldwin og Ísak Baldvin
Verkin eru frá árinu 2005 og voru fyrst sett upp á sýningunni Grús í Norræna húsinu. Verkið Litli Föstudagur er allt í senn, skúlptúr, míníbar, kaffivél, magnari og hátalari. Honum fylgja tvær fígúrur, Baldwin og Ísak Baldvin, sem halda hvor á sínum bakka og bjóða veitingar.
Listamaðurinn gefur.

Gunnhildur Hauksdóttir og Kristín Ómarsdóttir
Púlt
Verkið er færanlegt ræðupúlt á hjólum. Meðfylgjandi eru ræður eftir ýmsa höfunda frá mismunandi tímum. Verkið er prítt ljósum af ýmsum gerðum. Púlt var fyrst gert fyrir sýninguna Gjöf mín, yðar hátign sem sett var upp í listasafni ASÍ í febrúar 2011. Síðar var því breytt og var hluti af sýningunni Koddu sem haldin var í Nýlistasafninu og í Alliance húsinu við Grandagarð.
Listamennirnir gefa.

Neil Zakiewicz
Án titils
Um er að ræða skúlptúr gerðan úr svampi og viði. Verkið var hluti af stórri breskri samsýningu í Klink & Bank árið 2005 í sýningarstjórn Nínu Magnúsdóttur og Ólafar Björnsdóttur.
Erling Klingenberg gefur.

Ólafur Lárusson
úr ljósmyndaseríunni Example of a plastic face structure
Ljósmynd af situation þar sem listamaðurinn vefur andliti sínu inn í plast sem blautt er af málningu, í rammanum fyrir neðan ljósmyndina er plastið sjálft. Verkið var á sýningu í Kaupmannahöfn þar sem gefandi keypti það í maí árið 1980.
Ólafur Gunnarsson gefur.

Unnar Örn Auðarson
Hrörnunarsamstæðan
Skúlptúr, sýndur upprunalega í Safni árið 2007. Tengist bókinni Desire Archive, skúlptúrinn geymir frumgögn sem prentuð eru í bókverkinu.  Allir pappírar, póstkort, bréf og fleira sem var sýnt í Safni.  Unnar og fleiri sendu skúlptúrnum póstkort, hugmyndin er að halda áfram að senda verkinu póst og þannig sé það í stöðugri mótun.
Listamaðurinn gefur.

Unnar Örn Auðarson
Kringlan og ég
Um er að ræða gjörning, texti á ensku fylgir verkinu og úskýrir hvernig það var til. Skúffa með ýmsu smádóti frá listamanninum, sýnir brot úr lífi hans og gefur til kynna persónuleika hans. Verkið var sýnt í Gallerí Gúlp árið 1996 og fór fram í Kringlunni.
Listamaðurinn gefur.

Xoán Anleo
Unha Forma Publica De Representar
Silkiþrykk á pappa frá árinu 1992, 7stk, hvert um sig 13.9x13.9.
Listamaðurinn gefur.

Klaus Carsten
Hand of a heroine dead
Upprunalega gjöf til Unnars Arnar Auðarsson og Ingibjargar Magnadóttur. Verkið var hluti af sýningunni Reykjavík Teaparty árið 1999. Verkið var gert fyrir sýninguna, þegar Carsten kenndi við fjöltæknideild Myndlista- og Handíðaskólans.
Unnar Örn Auðarsson gefur.

Hildur Margrétardóttur, Lone Dögg Christensen og Þiðrik Hanssen
Skyndilist
Verkið er fjölfeldi frá árinu 2000, aftan á því er tölusetningin nr 30/36. Um er að ræða hluta af ferli sem var samstarfsverk á milli þessara þriggja aðila, var meðal annars selt í Bónus, í Pulsuvagninum á Lækjatorgi og í Kaupmannhöfn á vorsýningu þar. 
Unnar Örn Auðarson gefur.

Marcellvs L.
0667, 0778, 3195 og 1716
Fjögur verk frá árunum 2003-2009 úr seríunni Videorhizome eftir Marcellus L. sem sýnd voru í Nýlistasafninu í janúar 2011
Listamaðurinn gefur.

Carl Boutard
Audiovisual presentation
Myndbandsverk frá árinu 2005 sem var hluti af sýningu Carls í safninu 2011
Listamaðurinn gefur.

Bókverk í safneign:

Kristján Guðmundsson
DOWN,1972/ 1989
Bókverk með láréttum línum sem tákna annars vegar fjarlægð frá hæsta punkti jarðar niður að sjávarmáli og hins vegar fjarlægð frá sjávarmáls að neðsta punkt sjávarbotns. Útgefandi Kristján Guðmundsson / Fundatie og Vossforlag, Amsterdam.
Listamaðurinn gefur. 

Kristján Guðmundsson
STARS IN LATIN, 1987
Bókverk með mismunandi fjölda blárra punkta á hverri síðu, teiknaðir með bláum kúlupenna. Punktarnir eru allir svipað stórir en staðsetning þeirra á síðunni er mismunandi. Verkið var gefið út í 100 eintökum, en ekkert eintak eins. Útgefandi: Kristján Guðmundsson / Vossforlag, Amsterdam. 
Listamaðurinn gefur.

Unnar Örn Auðarsson
Langferð Andans - slóð undirvitundarinnar 1921-1953
Bókverk gefið út af Unnar Örn Forlag í Reykjavík 2011.
Listamaðurinn gefur. 

Unnar Örn Auðarsson
Grand Tour of the Psyche - traicing subconseiusness 1921-1953
Bókverk gefið út af Unnar Örn Forlag í Reykjavík 2011.
Listamaðurinn gefur. 

Peter Max Lawrence
Mr. Reassurance meets an Otter (in Reykjavík.)
Gefið út af paperwasterpress.com árið 2011
Listamaðurinn gefur. 

ALMANAC 2004 
Handgerð bók og geisladiskur eftir 12 listamenn: Hristina Ivannoska, Atanas Botev, Ana Stojkovik, Kyle Geer, Suzana Milevska, Slvica Janesileva, Oliver Musovik, Dijana Tomik Radevska, Igor Toseviski, Saso Stanojkovik, Dejan Spasovik, Karlotta Blöndal. Framleitt af Karlottu Blöndal, Skoole 2004.
Unnar Örn Auðarson gefur.

Heimildarsöfn (Arkíf um listamannarekin rými og Gjörningaarkíf):

Gjöf frá Hildi Hákonardóttur: Mobshop Dummy, SUM 75, Rifið bréf frá Sigurði Guðmundsyni, vélritað með lítilli ljósmynd frá situgation e. hann sjálfan, Boðskort frá Sigurði Guðmundssyni til Magnúsar Pálssonar, á boðskortið er ritað með blíanti Siggi while in a state of exhibiton, ljósmynd af innramnaðri ljósmynd. Allt á þetta heima í Heimildasafni um listamannarekin rými undir SÚM nema Mobshop dummy sem flokkast undir Bókverk.

Í heimildasafn um listamannarekin rými barst á árinu efni frá samstarfsverkefninu Mjólk (Unnar Örn, Karlotta Blöndal og Hlín Gylfadóttir, samstarfsverkefninu Tígurinn og ísbjörninn (Unnar Örn, Gunnhildur Hauksdóttir, Ragnar Kjartansson og Bjargey Ólafsdóttir). Einnig barst efni um rýmin Fiskur frá árinu 2000, Flotta galleríið frá 1985 og viðbætur við Gallerí Gúlp.

Í gjörningaarkífið barst efni frá Myriam Bat-Yosef og Gunndísi Ýr Finnbogadóttur.

Auk þess barst í heimildasafnið myndefni frá Magnúsi Pálssyni og fleirum, nánari upplýsingar um ýmis verk í safneign ofl sem ekki verður talið upp hér.


Veggspjaldasafn Nýlistasafnsins:

Guarilla Girls, Sýning í Nýlistasafninu 1994, 4 veggspjöld sem gerð voru í samhengi við sýningu listamannanna í safninu. Þau sýna tölfræðilega úttekt á stöðu kynjanna í íslenskum listheimi. Þetta eru aðeins 4 veggspjöld af miklu fleiri veggspjöldum sem gerð voru í samhengi við téða sýningu. Sýningin hafði ferðast um norðurlöndin og staðið íslenskum söfnum til boða, en söfnin afþökkuðu móttöku sýningarinnar. Nokkrir íslenskir myndlistamenn stofnuðu undirbúningsnefnd til þess að taka á móti sýningunni og setja hana upp í nýlistasafninu.  Þær voru; Erla Þórarinsdóttir, Brynhildur Þorgeirsdóttir, Guðrún Erla Geirsdóttir, Harpa Björnsdóttir, Svala Sigurleifsdóttir.

Veggspjald fyrir sýninguna Þar sem ég bjó og það sem ég lifði fyrir frá sýningu Hildar Hákonardóttur í listasafni ASÍ, 2011.
Veggspjald frá sýningu Bruna BB í Nýlistasafninu árið 1981
Veggspjald frá árinu 1967 frá sýningu Rósku í Gallerí SÚM
Veggspjald frá sýningunni 7 ungir myndlistamenn, sýning í myndlistahúsinu á Miklatúni árið 1973.
Veggspjald frá sýningu Magnúsar Tómassonar á Listahátíð í Reykjavík á Kjarvalsstöðum árið 1982.
Veggspjald frá samsýningu í Norræna Húsinu, Magnús Pálsson, Salomé Fannberg og Richard Waltingojer
4 veggspjöld frá Gernot Faber, Blackout am mittelpunkt der erde, sýnt á Sequences árið 2011 (þetta eru í raun fjölfeldi).


Auk þess bárust fjöldi bóka og sýningarskráa í bókasafn Nýlistasafnsins.

Ársfundur Félags Nýlistasafnins var haldinn 5. maí 2011 kl. 19.00.

Ný stjórn var kjörin

Aðalstjórn
Gunnhildur Hauksdóttir, formaður
Bjarki Bragason, ritari
Guðni Gunnarsson
Hjalti Þorkelsson
Indíana Auðunsdóttir

Varastjórn
Ólöf Gerður Sigfúsdóttir
Gunnar Helgi Guðjónsson
Tinna Guðmundsstjóri

STARFSMENN SAFNSINS 2011
Gunnhildur Hauksdóttir, safnstjóri
Ingunn Fjóla Ingþórsdóttir, framkvæmdastjóri

Hér fyrir neðan má lesa skýrslu fráfarandi stjórnar:

Skýrsla stjórnar Nýlistasafnsins - Aðalfundur 2011

Skýrsla tímabilsins 14. október 2010 til 5. maí 2011

Stjórn safnsin 2010-2011
Birta Guðjónsdóttir, formaður, til 1 árs
Gunnhildur Hauksdóttir, varaformaður, til 1 árs
Ingunn Fjóla Ingþórsdóttir, gjaldkeri, til 2 ára
Guðni Gunnarsson, ritari, til 2 ára
Páll Haukur Björnsson, stjórnarmeðlimur, til 1 árs, sem sagði sig úr stjórn nýlega, en Þorgerður Ólafsdóttir steig inn sem varamaður, í hans stað.

Tinna Guðmundsdóttir, varamaður í stjórn
Þorgerður Ólafsdóttir, varamaður í stjórn
Sigrún Jenny Barðadóttir, varamaður í stjórn

STARFSMENN SAFNSINS 2010-2011
-Birta Guðjónsdóttir, formaður stjórnar, 70% staða
-Ingunn Fjóla Ingþórsdóttir, framkvæmdastjóri, 60% staða

STARFSMENN Í SÉRSTÖKUM VERKEFNUM
-Gunnhildur Hauksdóttir vann við þróun og heimildaöflun í Arkíf um Listamannarekin rými. Hún vann við heimildasafn safnsins um listamannarekin sýningarými til 6 mánaða og lauk hennar vinnutímabili í desember 2010.
-Hildur Rut Halblaub listfræðinemi vann við skráningu safneignar, verkaláns-umsýslu og forvörsluverkefni og lýkur hennar vinnutímabili í lok maí 2011.

FÉLAGSMENN
Félagsmenn eru nú 308 talsins.
18 gengu í félagið frá síðasta aðalfundi.

STJÓRNARFUNDIR
Alls voru haldnir 16 stjórnarfundir frá síðasta ársfundi.

SAFNEIGN
-Hildur Rut Halblaub, sem hefur starfað í hlutastarfi við skráningu síðan skráningaverkefnið hófst árið 2008, hefur starfað við skráningu verka inn í Virtual Collection gagnagrunninn síðan í október. Hún vinnur jöfnum höndum við að bæta þar inn í og laga, og svo við forvörsluverkefni safnsins.

-Styrkir fengust frá Þjóðhátíðarsjóði og Safnasjóði til forvörslu þeirra verka safneignarinnar sem hafa orðið fyrir skemmdum í gegnum tíðina. Um er að ræða ca. 10 verk eftir Dieter Roth, ca. 20 verk eftir íslenska og erlenda listamenn og svo önnur 8 verk sem þarfnast fyrirbyggjandi forvörslu. Í verkefninu felst faglegt mat forvarða og listamanna, samantekt upplýsinga, samskipti við listamenn og aðstandendur þeirra, undirbúningur og umsýsla með vinnusvæði, efniskaupum, pökkun og skráningarviðhaldi.


KÚLUSPILSMÁLIÐ
Á síðasta ársfundi var greint frá því að Sveinn Þórhallsson, í Gallerí Nútímalist, hafi komið í safnið í umboði Magnúsar Jóhannssonar, sem áður rak Kúluna með Dieter Roth og Magnúsi Pálssyni, til að „sækja“ verkið „Kúluspil“ eftir Dieter frá 1961, sem hefur tilheyrt safneign safnsins síðan Magnús gaf það safninu árið 1994. Magnús lánaði safninu verkið fyrir sýningu á Listahátíð í Reykjavík. Þegar Níels Hafstein, þá formaður stjórnar Nýlistasafnsins, ætlaði að skila verkinu eftir sýningarlok vildi Magnús gefa safninu verkið. Verkið hefur verið í vörslu Nýlistasafnsins, skráð, sýnt og álitið sem í eigu þess í 16 ár.

Í eina af dagbókum Níelsar Hafstein frá árinu 1994 skrifar hann í tvígang um verkagjöf Magnúsar Jóhannssonar. Dagbókin er í vörslu Nýlistasafnsins ásamt öðrum dagbókum Níelsar sem formanns. Níels man glöggt eftir símtalinu við Magnús varðandi verkagjöfina.
 
Lögfræðingur Magnúsar Jóhannssonar sendi safninu bréf snemma í janúar 2011 og óskaði eftir því að safnið skilaði verkinu til hins meinta eiganda; Magnúsar Jóhannssonar.

Að ráðleggingu Ragnars Aðalsteinssonar lögfræðings skrifaði formaður ítarlegt bréf stuttu síðar til lögfræðings Magnúsar Jóhannssonar, þar sem allt ferlið er rakið; frá því beiðni um lán á verkinu barst frá Níelsi til Magnúsar. Í bréfinu er farið yfir þau rök Ragnars að hér eigi hefðarréttur við og verkið sé í réttri eigu Nýlistasafnsins.

Síðan hefur ekkert heyrst í lögfræðingi Magnúsar, Magnúsi sjálfum né Sveini Þórhallssyni varðandi umrætt listaverk.

HEIMILDASAFN OG INNRI STARFSEMI SAFNSINS
- Í byrjun febrúar hófust fundir Birtu, Gunnhildar og Hugins Þórs Arasonar með þeim 20 gjörningalistamönnum, sem þau hafa valið til þátttöku í samstarfsverkefni Nýlistasafnsins og útvarpsþáttarins Víðsjár á RÚV. Verkefnið er liður í söfnun á og miðlun heimilda um gjörninga. Frásagnir listamanna af eigin gjörningum eru teknir upp á hljóð og þeim útvarpað vikulega í Víðsjá. Sömu hljóðupptökur verða svo hluti af heimildasafni Nýlistasafnsins um gjörninga á Íslandi. Verkefnið er enn í gangi.

- Þann 14. janúar tók formaður við styrk til safnsins frá Sjóði Hlaðvarpans, vegna verkefnisins Listamannarekin sýningarými – kvennarými. Birta Guðjónsdóttir mun starfa áfram við það verkefni fram á sumar. Verkefnið hverfist um öflun, flokkun og skráningu heildar-heimilda um sýningarými sem rekin hafa verið af konum á Íslandi. Miðað er við að vinna með tveimur sagnfræðingum, sem leggja áherslu á kvennasögu, og miðla heimildunum í formi kynningar í safnrými og útgáfu bæklings.

SÝNINGAR OG VERKEFNI OPIN GESTUM Í SAFNRÝMINU
Fimm sýningar voru opnaðar í safninu á tímabilinu og nokkur fjöldi viðburða áttu sér stað;

-SJÓNÞING: UPPRIFJUN OG YFIRLIT(Bjarni H. Þórarinsson
Þann 23. október opnaði sýning á verkum Bjarna Þórarinssonar í sýningarstjórn Jóns Proppé. Bjarni sýndi ný og eldri verk. Stór hluti sýningarinnar er byggður á hljóðupptökum og vídeóupptökum af upplestri ýmissa textaverka Bjarna.

-Á Degi íslenskrar Tungu, þriðjudaginn nóvember, stóð Nýlistasafnið fyrir dagskrá þar sem flutt voru, og fjallað um, textaverk eftir Bjarna, Magnús Pálsson,(Birgi Andrésson,(Gunndísi Ýr Finnbogadóttur,(Harald Jónsson(og Sigtrygg Berg Sigmarsson.

-Á sýningartímanum voru gestum svo boðið á tvo aðra atburði; panel-umfjöllun Godds, Jóns Proppé og Bjarna H Þórarinssonar um verk Bjarna, svo og leiðsögn og spjall Bjarna og Jóns Proppé.

-TIME ME UP, Samsýning nemenda Erlings Klingenbergs í myndlistardeild Listaháskóla Íslands, sem bar titilinn „Time me up“ var opnuð þann 10. desember. Nemendurnir sýndu tímatengd verk. Sú sýning stóð yfir í þrjá daga.

-0667 0778 3195 1716((úr röðinni VÍDEÓRÍSÓM). Sýningarárið 2011 hófst á einkasýningu brasilíska listamannsins Marcellvs L, sem opnaði þann 8. janúar. Marcellvs L sýndi vídeóverk í aftara rými. Sýningin var styrkt af Goethe Institute.

-Marcus Steinweg. Í tengslum við sýningu Marcellvs L bauð safnið þýska heimspekingnum Marcus Steinweg í safnið, í samstarfi við Listaháskóla Íslands og Félag áhugamanna um heimspeki.
Marcus hélt þrjá fyrirlestra í Reykjavík; fyrirlesturinn „Bjögun Staðreynda/Obscurantism of facts“ í safnrými Nýlistasafnsins, fyrirlesturinn „On Philosophy & Art“ í fyrirlestrasal Listaháskólans í Laugarnesi og fyrirlesturinn „Between Form and Formlessness (Adorno´s affirmationism)“ í stofu HT-101 (hringstofu á Háskólatorgi). Koma Marcusar Steinweg var styrkt af Goethe Institute.

-KJARVALSDEILDIN. Þann 26. febrúar var sýningin Kjarvalsdeildin opnuð. Sýnendur voru 14 talsins, 10 íslenskir og 4 erlendir.

-Listamenn sýningarinnar gerðu gjörninga á hverjum laugardegi á sýningartímanum.

-Síðasta sýningardag sýningarinnar stýrði Ingunn Fjóla Ingþórsdóttir, stjórnarmeðlimur og framkvæmdastjóri, listamannaspjalli um sýninguna en þátttakendur voru þau Hulda Vilhjálmsdóttir, Sigtryggur Berg Sigmarsson, Snorri Ásmundsson og Valgarður Bragason. Vel var mætt og sköpuðust mjög áhugaverðar umræður.

-SEQUENCES. Þann 1. apríl opnaði Sequences listahátíðin. Nýlistasafnið bauð uppá gjörninga þýska listamanna-tvíeykisins Gernot Faber og hollenska fjöllistamannsins Peter Fengler, auk vídeóverks dansk-austurríska listahópsins Signa.

-KODDU. Þann 16. apríl síðastliðinn opnaði sýningin „Koddu“ í safnrými Nýlistasafnsins og í Alliance húsinu úti á Granda. Sýningarstjórar eru Ásmundur Ásmundsson, Hannes Lárusson og Tinna Grétarsdóttir. Sýnendur eru yfir 40 talsins.

-Sýningin og pólitíkin í kringum hana hefur vakið sterk viðbrögð. Eins og félagsmenn hafa fengið sendar tilkynningar um, þá var safninu hótað málssókn, vegna höfundar- & sæmdarréttar, ef safnið yrði ekki við kröfu um að fjarlægja eitt verka sýningarinnar; „Fallegasta bók í heimi“. Stjórn óskaði þegar í stað eftir því við sýningarstjóra Koddu að þeir gengjust formlega við verkinu sem höfundar þess og undir nafni, en þeirri ósk var ekki svarað. Ljóst var að ef stjórn hefði horft framhjá kröfu Crymogea færu málaferli af stað. Stjórn Nýlistasafnsins leitaði álits hjá lögfræðingum og eftir miklar umræður og mat á aðstæðum ákvað stjórn að fjarlægja verkið.

Fráfarandi stjórn hefur ákveðið að kalla til félagsmenn og ræða þessa atburði á sérstökum félagsfundi síðar í maímánuði.

ÖNNUR STARFSEMI SAFNSINS, SAMSTARF OG NÁMSKEIÐ
-Safnið hefur, það sem af er árs, lagt mikla vinnu í að finna og skanna inn ljósmyndir og gögn fyrir Listasafn Íslands, vegna heimildaöflunar fyrir hina Íslensku Listasögu.

-Í október hófst svokallaður fleygur í myndlistardeild Listháskólans sem stýrt var af Gunnhildi Hauksdóttur varaformanni. Fleygurinn fókuseraði á arkíf Nýlistasafnsins um listamannarekin sýningarými á Íslandi, Sérstök áhersla var lögð á vinnu með alþjóðlega verkefnið Mobshop, sem Magnús Pálsson var upphafsmaður að og stýrði í upphafi 9. áratugarins. Nemendur hittu Gunnhildi í safnrýminu og í húsnæði skólans.

-Í október fór fram námskeið í hönnunardeild Listaháskólans undir stjórn Ármanns Agnarssonar, grafísks hönnuðar. Námskeiðið fókuseraði á Nýlistasafnið. Nemendum var uppálagt að hanna kynningarefni fyrir safnið og kynntu sér vel sögu þess og safneign. Tinna Guðmundsdóttir þáverandi framkvæmdastjóri safnsins var Ármanni til aðstoðar. Birta Guðjónsdóttir og Daníel Björnsson tóku þátt í heils dags yfirferð yfir verkefni nemendanna í lok námskeiðs.

-Í febrúar auglýsti safnið eftir umsóknum um þátttöku í samsýningunni Grasrót, sem verður opnuð í safninu í haust. Kristjana Rós Guðjohnsen hefur tekið að sér að stýra sýningunni og stjórn fékk þau Kristínu Dagmar Jóhannesdóttur og Markús Þór Andrésson til þess að skipa valnefnd fyrir sýninguna, ásamt Kristjönu. Um 70 umsóknir bárust og völdu þau 8 myndlistarmenn af yngri kynslóðinni í sýninguna.

-Í mars dvöldu nemendur myndlistardeildar Listaháskólans heilan dag í safninu við að skoða og ræða um valin bókverk úr safneign safnsins, undir stjórn Aðalheiðar Lilju Guðmundsdóttur listheimspekings og Ingólfs Arnarssonar myndlistarmanns.

FJÁRMÁL
-Safnið fékk 4.200.000 kr. styrk frá Reykjavíkurborg, 200.000kr niðurskurður frá fyrra ári. Niðurskurður var hinsvegar um 800.000kr. af Fjárlögum frá síðasta ári, og nemur styrkur þessa árs  7.200.000 kr.

-Í ljósi þessa mikla niðurskurðar lagði formaður safnsins til við stjórn að starfshlutfall hennar yrði lækkað og þar með sparaðist safninu fé. Starfssvið formanns minnkaði þó ekki sem slíkt heldur var um að ræða launalækkun.

-Ingunn Fjóla framkvæmdastjóri mun skýra nánar frá fjármálum safnsins hér á eftir.

HÚSNÆÐISMÁL
-Miklar framkvæmdir hafa átt sér stað á efri hæðum byggingarinnar að Skúlagötu 28 síðan í október 2010, en þar mun KEX Hostel opna á næstu dögum.

-Mikil truflun hefur verið af þessum framkvæmdum frá því fyrir áramót, því allt inntak ramagns, vatnsleiðslna osfrv. er að finna í safnrýminu á jarðhæð.

-Truflunin hefur annarsvegar falist í miklum hávaða, viðgerðum í safnrými og því stöðugum tilfærslum, sem hafa útheimt mikið eftirlit, fundarsetu, samningagerð, trygginga-mat og bara stöðugan barningi, af hendi formanns og framkvæmdastjóra.

-Formaður fékk fellda niður leigu í einn mánuð vegna þessa óþæginda. Starfsemi safnsins var þó haldið áfram sleitulaust á tímabilinu.

-Þess má þó geta að hinir nýju leigjendur, eigendur KEX Hostels, hafa sýnt eins mikla tillitssemi og þeir hafa getað, samskiptin eru mjög góð á milli safnsins og hostelsins og munu eflaust verða góð samlegðaráhrif í húsinu, ásamt dansverkstæðinu á efstu hæð, á komandi árum.

FRAMUNDAN ERU ÞESSI VERKEFNI STAÐFEST Í SAFNINU Á ÁRINU 2011
Einkasýning sænska listamannsins Carl Boutard, Sumarsýning úr safneign; Lestur í sýningarstjórn JBK Ransú, Grasrót 2011 í sýningarstjórn Kristjönu Rósar Guðjohnsen. Ýmislegt annað er í burðarliðnum sem enn er óstaðfest, bæði varðandi tímasetningar og annað.

Lýkur hér skýrslu stjórnar fyrir tímabilið.

Kærar Þakkir fyrir hönd stjórnar,
Birta Guðjónsdóttir
formaður stjórnar Nýlistasafnsins

Ársfundur Félags Nýlistasafnsins var haldinn miðvikudaginn 3. nóvember. Kl:17:30 í húsakynnum safnsins við Skúlagötu 28. Hér fyrir neðan er hægt að lesa skýrslu stjórnar vegna ársins 2009-2010. Auk þess er hægt að nálgast fundargerðina hér .

Skýrsla stjórnar Nýlistasafnsins - Aðalfundur 2010

Skýrsla tímabilsins 22. september 2009 til 14. október 2010 (og örlítið skyggnst inní framtíðina).

STJÓRN FÉLAGS NÝLISTASAFNSINS
Seinasti ársfundur var haldinn 22. September 2009. Ný stjórn var kjörin:
Birta Guðjónsdóttir, formaður, til 1 árs
Tinna Guðmundsdóttir, gjaldkeri, til 1 árs
Gunnhildur Hauksdóttir, varaformaður, til 2 ára
Páll Haukur Björnsson, stjórnarmeðlimur, til 2 ára
Gunnar Már Pétursson, ritari, til 2 ára
Huginn Þór Arason, varamaður í stjórn
Karlotta Blöndal, varamaður í stjórn
Unnar Örn Jónasson, varamaður í stjórn
Þessir fóru úr stjórn:
Nína Magnúsdóttir, formaður
Andrea Maack, gjaldkeri
Karlotta Blöndal, sagði af sér varamennsku í stjórn í febrúar.


STARFSMENN SAFNSINS
-Birta Guðjónsdóttir, formaður stjórnar, 80% staða
-Tinna Guðmundsdóttir, framkvæmdastjóri, 62% staða

STARFSMENN Í SÉRSTÖKUM VERKEFNUM
-Elín Þórhallsdóttir, starfsmaður safneignardeildar, 50% staða til September 2010.
-Gunnhildur Hauksdóttir við þróun og heimildaöflun í Arkíf um Listamannarekin rými.
-Sólveig Jörgensen við flokkun og skráningu heimildasafns um Gjörninga á Íslandi.
-Hildur Rut Halblaub við flokkun og skráningu Póstlistar (mail-art) í heimildasafni Nýlistasafnsins.
-Nánar verður komið að þessum verkefnum síðar

-Inesa Pavlovska og Salne Buciute, nemar í listfræði frá Listaakademíunni í Vilníus, Litháen, unnu sem sjálfboðaliðar í safninu um 3 mánaða skeið í sumar, fyrir tilstilli styrks frá Erasmus. Þær unnu við skönnun efnis við heimildasafn safnsins og sýningu á verkum Bjarna H. Þórarinssonar, auk þess sem þær aðstoðuðu við uppsetningu sýninga og viðburða í safninu.


FÉLAGSMENN
Félagsmenn eru nú 281 talsins.
25 gengu í félagið frá síðasta aðalfundi.

Okkur langar að minnast Ingileifar Thorlacius, félagsmanns og fyrrum stjórnarmeðlims safnsins, sem lést á árinu. Blessuð sé minning hennar.


STJÓRNARFUNDIR
Alls voru haldnir 32 stjórnarfundir frá síðasta aðalfundi.


ÚTGÁFA
Bókin „Nýlistasafnið / The Living Art Museum 1978-2008“ kom út 26. febrúar 2010, í ritstjórn Tinnu Guðmundsdóttur. Bókin er 360 bls. hönnuð af Ármanni Agnarssyni, gefin út af Nýlistasafninu. Bókin er í sölu í bókabúðum á höfuðborgarsvæðinu og áætlað er að koma henni í dreifingu erlendis á næsta ári.


SAFNEIGN
Í lok árs 2009 lauk svokallaðri forskráningu á safneign safnsins, þ.e.a.s. skráningu allra verka auk ljósmyndunar þeirra og pökkunar með skráningarnúmeri.
Safnið gat fjármagnað starf starfsmanns safneignardeildar, Elínar Þórhallsdóttur, fyrstu 3 mánuði ársins fyrir tilstilli styrks frá Þjóðhátíðarsjóði. Sá tími var nýttur til skráningar safneignar inn í Virtual Collection gagnagrunninn, sem er aðgengilegur leitar- og upplýsingagrunnur sem helstu söfn á landinu nota. Elín hélt áfram því mikilvæga starfi til loka ágústmánaðar, fyrir tilstilli 6 mánaða Átaksverkefnis Vinnumálastofnunar, þar sem hún vann í hálfu starfi fyrir laun, sem voru greidd að hluta frá Vinnumálastofnun og að hluta frá Nýlistasafninu. Verkefninu; að skrá um 2.000 verk safneignarinnar inn í gagnagrunninn, lauk nú í lok ágúst.
Vinna við safneign á árinu hefur aðallega falist í því að búa vel um safneignina í aftasta rými í nýju húsnæði hér við Skúlagötu. Þ.e. að pakka inn í réttar pakkningar, huga að hita- og rakastigi í geymslum, útbúa hirslur og rekka fyrir sérstök verk og útbúa geymslu í aftasta rými, sem hæfi vel verkum safnsins til geymslu. Settur var upp hitablásari, rakamælir og vifta í miðju rýmisins,. Loks voru verkin færð inn í hilluskipulag. Þessari vinnu er ekki lokið og heldur áfram.
HEIMILDASAFN OG INNRI STARFSEMI SAFNSINS
-Skjalasafn Nýlistasafnsins var flokkað og formlega afhent Borgarskjalasafni til varðveislu þann 15. febrúar 2010. Unnið er að því að búa til skjalaskrá yfir gögnin til að opna fyrir aðgengi fyrir almenning.

Í mars voru heimildasöfn safnsins um Listamannarekin sýningarými og um Gjörninga á Íslandi, sett í hillur í safnrýminu og skrifstofa þess og eldhúsaðstaða sett upp, allt með húsgögnum sem safnið átti fyrir eða gat nálgast sér að kostnaðarlausu. Safnið fékk til liðs við sig styrkþega Nýsköpunarsjóðs námsmanna yfir sumarmánuðina, Sólveigu Jörgensdóttur, bókasafns- og upplýsingafræðing. Hún hefur skráð núverandi heimildasafn safnsins um Gjörninga á Íslandi, en það safn er í stöðugri vinnslu og þróun. Unnið hefur verið að því að afla frekari heimilda í heimildasafn um listamannarekin sýningarými á Íslandi til viðbótar við það sem fyrir var til í safninu. Styrkur fékkst fyrir tilstilli Átaksverkefnis vinnumálastofnunar fyrir starfsmanni í hálfri stöðu, Gunnhildi Hauksdóttur varaformanni safnsins. Hún hefur unnið að þróun og vexti heimildarsafnsins til 6 mánaða og lýkur hennar vinnu nú í desember. Bæði þessi heimildarsöfn eru og verða í stöðguri vinnslu í safninu til frambúðar.

-Í mars tók stjórn Nýlistasafnsins á móti einum af samstarfsaðilum sínum í verkefninu “Uppspretta”, sem hverfist um samstarf við nokkra valda sýningarstjóra frá Norðurlöndunum, sem heimsækja safnið og kynna sér starfsemi þess, sögu og samhengi, listalífið og möguleika þess. Í kjölfarið vinna samstarfsaðilarnir verkefni fyrir safnið, í formi sýningar, útgáfu, fyrirlestraraðar, málþings eða pallborðsumræðna. Verkefnið er styrkt af Norrænu Menningargáttinni/Kultur Kontakt Nord.
Tone Hansen, sýningarstjóri í Henie Onstad samtímalistasafninu í Osló heimsótti safnið og kynnti sér sérstaklega safn þess af Póstlist / mail-art, en nokkuð er um slík verk í heimildasafni safnsins, frá 8. áratugnum.
-Í kjölfar þessa hvöttum við listfræðinemann Hildi Rut Halblaub til að kanna Póstlist safnsins nánar, en hún hafði áður sýnt því áhuga. Hildur hlaut styrk frá Nýsköpunarsjóði Námsmanna til að vinna að skráningu og ástandsmati á safni Nýlistasafnsins um Póstlist, sumarið 2010, og hefur nýlokið verkefni sínu.
-Í apríl tókum við líka á móti öðrum samstarfsaðila safnsins í “Uppsprettu” verkefninu; Kim Einarsson, forstöðumann Konsthall C í Stokkhólmi, og sjálfstæðum sýningarstjóra.

SÝNINGAR OG VERKEFNI OPIN GESTUM Í SAFNRÝMINU
Fimm sýningar voru opnaðar í safninu á tímabilinu og töluverður fjöldi viðburða áttu sér stað;
Opnunarhátíð safnsins í febrúar var kallað eftir félögum safnsins og boðið upp á mikla gjörningadagskrá, þar sem um 30 listamenn stigu á stokk og kveðjur, í formi gjörninga og upplestra, voru fluttar/framkvæmdar, einnig fyrir hönd félagsmanna Nýlistasafnsins erlendis. Meðal þátttakenda voru: Nýlókórinn, Magnús Pálsson, Hjálmar Sveinsson & Oddný Eir Ævarsdóttir, Ghostdigital og Finnbogi Pétursson, Hannes Lárusson, Gjörningaklúbburinn, G.Erla, Daði Guðbjörnsson, Birna Þórðardóttir, Bjarni H. Þórarinsson & Guðmundur Oddur-Goddur, Snorri Ásmundsson, Ásmundur Ásmundsson, Olivia Plender, Wolfgang Müller, Hettie van Egten, Jan Voss & Rúna Þorkelsdóttir, Steingrímur Eyfjörð, Guðrún Hrönn Ragnarsdóttir og margir fleiri.

-Samræði við safneign, var sýning á yfir 30 verkum úr safneign, sem valin voru af stjórn. Nokkru síðar opnaði viðbót við þá sýningu, sem átta ungir listamenn af settu saman úr verkum sem þeir völdu úr safneigninni í kjölfar þriggja vikna kynningarferlis í safninu undir handleiðslu Birtu og Páls Hauks.

-CharlieHotelEchoEchoSierraEcho, sýning þýska listtvíeykisins Rosen/Wojnar sem búsettir eru í Berlín. Florian Wojnar og Nikolai von Rosen komu í safnið í vettvangskönnun í janúar og svo aftur í maí. Í sýningu sinni vísuðu þeir beint til valinna verka úr safneign. Sýningin var styrkt af Goethe Institute og var framlag safnsins til Listahátíðar í Reykjavík.

-Sýningin Old News opnaði júlí, þar er um að ræða ferðasýningu, verkefni danska sýningarstjórans Jakob Fabricius, stýrt af Jakobi og stjórn Nýlistasafnsins en þungamiðja hennar eru staflar af dagblöðum sem hvert um sig er unnið af mismunandi listamönnum. Sýningin var hér sett upp í 11. sinn og var styrkt af Danish Art Council.
Samhliða henni var einnig Skríllinn GEGN ákæruvaldinu, eins dags atburður og sýning í framhaldi, stýrt af Steinunni Gunnlaugsdóttur, Snorra Úlfhildarsyni, Páli Hauki Björnssyni og listamönnunum. Sú sýning hófst með stórri, pólitískri uppákomu í safnrýminu þar sem fram komu og sýnd voru verk um 30 íslenskra listamanna allra listgreina, til stuðnings hinum svokölluðu níumenningum.

-Í september opnaði einkasýning Libiu Castro og Ólafs Ólafssonar á myndbandsverki þeirra „Lobbyists“. Sýningin var styrkt af Myndstefi.

-Í lok september sýndi Nýlistasafnið franskar animation-hreyfimyndir í samstarfi við RIFF Kvikmyndahátíð í Reykjavík og Alliance Francais.

• Í október unnu nemendur úr LHÍ, grafískri hönnun, undir handleiðslu Ármanns Agnarssonar og Tinnu Guðmundsdóttur, í safninu. Þau skoðuðu verk úr safneign og enduðu kúrsinn á að hanna kynningarefni fyrir „ímyndaða sýningu“ í safninu á verkum úr safneigninni.

• Í lok október opnaði yfirlitssýning á verkum Bjarna H. Þórarinssonar í safninu. Sýningarstjóri er Jón Proppé listheimspekingur. Á opnun sýningarinnar og yfir sýningartímabilið var boðið uppá gjörninga og umræður um textanotkun í myndlist, undir stjórn Jóns Proppé. Stór hluti sýningarinnar er byggður á hljóðupptökum og vídeóupptökum af upplestri ýmissa á texta Bjarna.

-Páll Haukur stjórnarmeðlimur valdi Söru Björnsdóttur sem listamann mánaðarins í Nýló, og gerði Sara verk beint á vegg safnsins. Sara reyndist verða listamaður ársins í safninu, því þemað datt uppfyrir og verkið stendur enn.

-Í mars sýndu nemendur í myndlistardeild Listaháskóla Íslands verk sín í kraftmikilli gjörningasýningu undir stjórn Erlings T.V. Klingeberg listamanns, þar sem gjörningaformið var í forgrunni..

-Í mars hélt Listfræðafélag Íslands málþing um “Túlkun myndlistar á líðandi stundu” í samstarfi við Nýlistasafnið og í safnrými þess. Þátttakendur voru Jón Proppé, listheimspekingur og gagnrýnandi, Margrét Elísabet Guðmundsdóttir, fagurfræðingur og gagnrýnandi, Ólafur Gíslason, listfræðingur og gagnrýnandi, Oddný Eir Ævarsdóttir, safnaheimspekingur og rithöfundur, Þóra Þórisdóttir, mynlistarkona og gagnrýnandi.

-Í apríl bauð safnið gjörningalistakonunni Mörthu Wilson til landins, til að flytja tvo fyrirlestra um gjörningalist í New York frá 7. áratugnum í Nýló og í LHÍ um listamannarekin sýningarými á heimsvísu, með sérstaka áherslu á sitt eigið sýningarými í New York; Franklin Furnace. Koma Mörthu Wilson til Reykjvíkur var styrkt af Sendiráði Bandaríkjanna á Íslandi.

-Í júní átti safnið í samstarfi við listahátíðina Jónsvöku, og fóru fram dans-gjörningar í safnrýminu sem hluti hátíðarinnar.

-Íslenski Safnadagurinn rann upp þann 11. júlí og varð mikilvægur dagur í sögu Nýlistasafnsins en þann dag voru safninu veitt Íslensku Safnaverðlaunin 2010, sem veitt eru af Safnaráði annað hvert ár. Formaður stjórnar veitti verðlaununum viðtöku við hátíðlega athöfn á Bessastöðum. Fyrr um daginn bauð safnið upp á leiðsögn um yfirstandandi sýningu og kynningu á safneigninni.


SÝNINGAR OG VIÐBURÐIR UTAN NÝLISTASAFNSINS
(verkalán, samstarfsverkefni, málþingsþátttaka, fyrirlestrar)

-Í janúar hófst samstarf Nýlistasafnsins við Arkitektadeild Listaháskóla Íslands, en útskriftarnemendum var sett fyrir það verkefni fyrir að hanna nýbyggingu fyrir Nýlistasafnið. Útskriftarverkefni nemenda voru kynnt á útskriftarsýningu LHÍ í Hafnarhúsinu í maí.

-Nýlistasafnið lánaði listaverk úr safneign sinni á sýningar í Listasafni Reykjavíkur, Kjarvalsstöðum og Hafnarhúsi, svo og til Listamiðstöðvarinnar Hafnarborgar í Hafnarfirði. Safnið skannaði einnig inn ljósmyndir og gögn fyrir Listasafn Íslands, vegna heimildaöflunar fyrir hina Íslensku Listasögu.

-Í október 2009 var tveimur fulltrúum safnsins boðin þátttaka í málþingi um listamannarekin sýningarými á vegum listamannarekna gallerísins Signal í Malmö og fóru stjórnarmeðlimirnir Karlotta Blöndal og Gunnar Már Pétursson þangað, héldu fyrirlestur um Nýlistasafnið og áttu í samræðu við kollega.

-Í maí flutti Birta Guðjónsdóttir fyrirlestur um Nýlistasafnið og íslenska myndlist í listamiðstöðinni Loft Project Etagi í St Pétursborg, Rússlandi. Í byrjun maí kynnti Birta Nýlistasafnið fyrir nemendum í Listaháskóla Íslands, í fjölnotasal Hafnarhússins.

-Í september var fulltrúa Nýlistasafnsins boðið að taka þátt í málþingi um gjörningalist á Norðurlöndum, sem hluti af listahátíðinni ANTI í Kuopio, Finnlandi. Gunnhildur Hauksdóttir varaformaður fór þangað og hélt fyrirlestur um sögu Nýlistasafnsins sem megin-vettvang gjörningalistar á Íslandi, um gjörninga-arkíf safnsins og um safnið almennt. Í september hóf Gunnhildur einnig hlutakennslu í Myndlistardeild Listaháskóla Íslands um listamannarekin sýningarými á Íslandi, sem byggir á heimildasafni Nýlistasafnsins. Fleygurinn fer fram til áramóta, í LHÍ og safnrými Nýlistasafnsins.


TÆKJAKOSTUR
Í September keypti safnið nær ónotaðan HD-skjávarpa á afar góðu verði. Safnið mun leigja varpann út til menningarstofnana gegn gjaldi, sem gengur upp í kostnaðinn.

Safnið keypti notaðan Blueray-dvd spilara á góðu verði.

Safnið keypti notaðan hljóðmixer á góðu verði.

Gert var við aðaltölvu safnsins í sumar en hún er komin vel til ára sinna. Starfsmaður safneignardeildar vinnur á gamla kjöltutölvu, sem safnið keypti fyrir nokkrum árum. Aðrir starfsmenn og stjórnarmenn vinna á eigin tölvur.

Safninu barst nýlega gjöf frá Önnu Hallin og Olgu Bergmann, þrjú stór sjónvarpstæki, og kann safnið þeim bestu þakkir fyrir!

FJÁRMÁL
Safnið fékk 4.200.000 kr. styrk frá Reykjavíkurborg, 8.000.000kr. frá Menntamálaráðuneytinu, 400.000 frá Þjóðhátíðarsjóði vegna skráningarvinnu safneignar og 500.000 frá Safnasjóði sem rekstrarstyrk.
Styrkir vegna bókarinnar fengust frá Reykjavíkurobrg, Hagþenki, Bókmenntasjóði, Kynningarmiðstöð Íslenskrar Myndlistar, Safnasjóði og Francescu Thyssen Bonemizsca von Habsburg. Auk þess keypti Utanríkisráðuneytið 40 stykki af bókinni, sem verða kynnt í sendiráðum Íslands og kynningum erlendis.

SÖFNUNARSTEFNA OG LISTAVERKAGJAFIR
Söfnunarstefna stjórnar var mörkuð fyrri hluta árs og hljóðar svo: “Safnið tekur við listaverkagjöfum en áskilur sér rétt til að hafna verkagjöfum, byggt á listrænum forsendum eða vegna geymsluvanda. Einu sinni á ári kemur stjórn Nýlistasafnsins sér saman um val á einum félagsmanni með það að markmiði að óska eftir verki/verkum frá honum inn í safneign sína, nýtt eða eldra verk.”

Listaverk eftir eftirfarandi listamenn voru tekin í safneign:
Steingrímur Eyfjörð, Magnús Pálsson, Eric Anderson, Nikolai von Rosen & Florian Wojnar, danski listahópurinn Perfyme, Helgi Ásmundsson. Bókverk eftir: Unnar Örn Jónasson, Oliver Kochta, Lucy Harrison, John Wood & Paul Harrison, Fiona Robertson og Stig Brogger.
Stjórn hefur komið sér saman um að biðja sérstaklega Helga Þórsson myndlistarmann, um að gefa verk í safneignina, og hefur Helgi áhuga á því og hefur staðfest að hann muni gefa safninu verk eftir sig á næstu mánuðum.

HÚSNÆÐISMÁL
September 2009:
Greint var frá fyrirætlunum stjórnar á síðasta aðalfundi um að segja upp leigunni á Laugavegi 26, vegna hækkunar, og taka á leigu húsnæðið á jarðhæð Skúlagötu 28, þar sem kexverksmiðjan Frón var áður til húsa. Gerður var leigusamningur til 5 ára og var hann undirritaður af nýjum formanni og nýjum framkvæmdastjóra.
Í september fóru Nína og Birta á fund aðstoðarmanns mennta- og menningarmálaráðherra og skrifstofustjóra ráðuneytisins, og sóttu um 3 milljóna króna aukafjármagn vegna flutnings safnsins í nýtt húsnæði og kostnaðar við að standgera listaverkageymslu. Þær voru veittar.

Í september og október var orkunni beint að mestu í að klára pökkun á verkum safneignarinnar til flutnings á Skúlagötu 28. Flutningur verkanna frá Laugavegi að Skúlagötu fór fram í lok október  undir stjórn Tinnu. Þann 1. nóvember var lyklunum að rýminu að Laugavegi 26 skilað. Verkunum var komið fyrir á 3. hæð Frón-hússins, en stjórn hafði gert samning um að fá að geyma verkin þar í fáeina mánuði, á meðan hreinsun og undirbúningur rýmisins á jarðhæð færi fram.

Húsnæðisframkvæmdir: Mikil vinna var fyrirliggjandi í nýju húsnæði á jarðhæðinni, sem var unnin í verkstjórn Gunnhildar stjórnarmeðlims og hófst sú vinna í ágúst 2009. Það þurfti að hreinsa burtu bakaraofna kexversmiðjunar, brjóta leiðslur, rífa niður veggi og reisa aðra, búa til dren, leggja pípulagnir, laga rafmagn, háþrýsti-þrífa, mála, sprautumála, hreinsa flísar og hafa umsjón með iðnaðarmönnum. Félagsmenn voru kallaðir til hjálpar og Fagmenn.is ráðnir. Það var hreinsuð málning af gólfum svo í ljós komu flísalögð gólf kexverksmiðjunar sem nú einkenna safnið. Hver einasta spýta var nýtt og öll stjórnin var eins og í herskyldu ásamt kröftugum félagsmönnum að pússa, brjóta, hreinsa, mála og laga. Húsið var opnað í febrúar en þá átti enn eftir að flytja safneignina niður. Húsaviðgerðum var ekki lokið. Við lögðum áherslu á að hreinsa vel upp, sótthreinsa og velja vandlega efni sem notuð væru í innra rýmið svo vel færi um safneignina, fá raka- og hita- mæla og undirbúa rýmið áður en safneign var að lokum flutt niður nú í júní. Safneignin er núna í fyrsta skipti í langan tíma í einu safnrými ásamt annarri starfsemi safnsins. Húsnæðisviðgerðum er þó fjarri því lokið, það á eftir að gera merkingar utandyra, mála glugga og ljósarennur, bæta aðgengi fyrir fatlaða, salernisaðstöðu, laga rafmagnstokka, reisa upphengis-veggi og fleira.
~
Að koma jarðhæðinni á Skúlagötu í það horf sem hún er í núna skal ekki dyljast að var TÍTANÍSKT verkefni og safninu dýrt þó allt hafi verið sparað og nýtt eftir fremsta megni. Þjónusta Fagmanna.is reyndist dýrari en kostnaðaráætlun þeirra sagði til um enda óx verkefnið framúr áætlunum, eins og oft vill verða með iðnaðarframkvæmdir. En þetta hafðist að lokum með ómetanlegri hjálp félagsmanna og er ekki úr vegi að þakka þeim sem hönd lögðu á plóg, sérstaklega fyrir!

FRAMUNDAN ERU ÞESSI VERKEFNI Í SAFNINU Á ÁRINU 2010

• Í desember munu en og aftur nemendur í myndlistardeild Listaháskóla Íslands sýna verk sín í eins dags viðburði, undir stjórn Erlings T.V. Klingeberg. Sýningin „TÍMI“ mun vara í tvo daga.


NÆSTA ÁR 2011
Á næsta ári heldur verkefnið „Uppspretta“ áfram, áætlaðar eru 7-8 sýningar, íslenskra og erlendra listamanna, s.s. samsýning Snorra Ásmundssonar, Ásmundar Ásmundssonar, Helga Þórssonar, Sigtryggs Berg Sigmarssonar og Steingríms Eyfjörð, og einkasýningar íslenska listamannsins Curvers Thoroddsen, sænska listamannsins Carl Boutard, þýska listtvíeykisins Gernot Faber og brasilíska listamannsins Marcellvs L.

Sýningin „Grasrót“, sýning á verkum yngstu kynslóðar íslenskra myndlistarmanna verður sett upp. Sýningin hefur verið haldin árlega í safninu síðan árið 2000 en lagðist niður á sl. tveimur árum.

Í vor opnar sýning á verkum úr safneign Nýlistasafnsins, með útgáfu um safneignina.

Auk þessa mun safnið standa fyrir fyrirlestrum, listamannaspjalli, pallborðsumræðum og gjörningaverkefni í samstarfi við Ríkisútvarpið Rás 1.

Nýló hefur eignast góða nágranna því á efstu hæð byggingarinnar við Skúlagötu 28 opnaði fyrsta íslenska Danshúsið nú á dögunum, en það er rekið af Félagi Íslenskra Dansara og Danshöfunda.

Lýkur hér skýrslu stjórnar fyrir tímabilið.

Kærar Þakkir fyrir hönd stjórnar,
Birta Guðjónsdóttir
formaður stjórnar Nýlistasafnsins

Tryggir lesendur dagbókar verða enn og aftur að fyrirgefa okkur skrifstífluna en hér á sjávarsíðunni er alltsaman í lukkunar velstandi.

Opnunarhátíðin með sinni pomp og prakt tókst vel og stuttu seinna opnaði fyrsta sýningin í nýju rými. Samræði við safneign þar sem stjórnin fór höndum um safneignina og valdi úr. Sú sýning er róterandi og munu bætast við hana verk á sýningartímabilinu auk þess sem eventar fléttast inní hana.

Birta og Páll Haukur hafa fengið til liðs við sig þau Kristínu Rúnarsdóttur, Etienne de France, Þorgerði Ólafsdóttur, Þorvald Jónsson, Magnús B. Hafsteinsson, Hörpu Dögg Kjartanssdóttur og Björk Viggósdóttur sem eru um þessar mundir að grúska í safneignni og þau ætla að kynna sitt val með spjalli laugardaginn 10. Apríl kl 17:00. Stjórnin er enn að grúska, Gunnhildur bæði í munnlegum heimildum og ætlar að skipta út teikningum Árna Ingólfssonar fyrir ljósmyndavek og enn er á huldu hvað kemur útúr frekara grúski en ýmislegt í burðarliðnum.

Erling kom með nemendur í byrjun mánaðar og þau settu upp í safninu upp afrakstur sex vikna í helvíti með Erling sem gjörbreytti safninu og safneignarsýningunni þannig að allt var hér á iði.

Málþing Listfræðingafélagsins verður haldið þriðjudaginn 30. Apríl í Nýló klukkan 17:00

Martha Wilson frá Franklin Furnace kemur í heimsókn og heldur hér fyrirlestur um listamannarekin rými og performansa en hún er og hefur verið leiðandi afl og frumkvöðull á því sviði. Mæli með því að kíkja nánar á hana Fyrilesturinn er 26. Apríl í Nýlistasafninu og svo aftur í Laugarnesinu daginn eftir ásamt Gunnhildi Hauksdóttur en hún ætlar að kynna starfsemi safnsins um söfnun á heimildum um listamannrekin rými á íslandi.

Hér er að lokum hellingur af myndum sem glöggir lesendur geta glöggvað sig á.
Lifið heil.