Nýlistasafnið - The Living Art Museum

föstudagur, 27. jún 09:49

Vikan sem senn tekur enda hefur verið hin besta á safninu. Kalli Kvistur var tekinn niður eftir vel heppnaða lokadagskrá á sviðinu. Plakötunum rúllað upp, sum verða send í galleríið hans Kalla, sum má Nýlistasafnið eiga og nokkrum var "stolið". Andrea og Huginn pökkuðu silfur-henginu góða og verður það sent með fed-exi heim til Kalla en hann er að fara að halda risa veislu um helgina og vill nota tjöldin til þess að setja upp samskonar svið heima í stofu hjá sér. Nokkrar íslenskar kanónur sem opna sýningu í Nef Jork í kvöld m.a Haraldur Jónsson og Ásmundur Ásmundsson hafa kíkt við og fengið marga dranga af bleika silki bielnals-farans R.K sem þeir hafa pakkað niður og tekið með sér til Nef Jork. Þar setur Ragnar upp Guð í mini-útgáfu og er planið að nota restina af silkinu í skyrtur á gengið. Frést hefur að Ólafur Elíasson sem er einmitt stauddur í stórborginni um þessar mundir að setja upp nokkrar fossa, hafi hringt í galleríið og beðið um að vera settur á VIP-lista, Ó.E + 3 gestir. Annar Ólafur hefur verið að slæðast inn í safnið þessa daganna en það er Ólafur Stefánsson landliðsfyrirliði í handbolta. Hefur hann heillast mjög af bókverkum í safneigninni en hann og Þorvaldur Þorsteinsson eru að vinna saman verkefni sem snýr að myndmál vs. tölvumál. Smiðirnir hjá Yðar Óskir í svið svitnuðu þegar þeir sáu fyrirliðann skella sér inn á safnið og grúska í verkunum, komu nokkrir inn og báðu um eiginhandaráritun og hafa 2 þeirra kíkt í bókverkin og sýnt safneigninni mikinn áhuga eftir að Ólafur var á svæðinu. Dísa og Andrea spjölluðu heillengi við landsliðhetjuna og ætlar hann að vera fastagestur í sumar, hann mun eyða helmingi af tíma sínu við að skoða bókverk safneignarinnar og helming að æfa fyrir Ólympíleikanna. G.Unnar kom á stjórnarfund, rauður í framan eftir mikla sól á Siglufirði og þóttist ekkert nenna til Nef Jork, skildi konuna eftir með uppvask og skítuga sokka á siglufirði meðan hann skála í kampavíni með stórstjörnum úr myndlistargeiranum erlendis. Tinna er öll að æsast út af bókinni um 30.000 ára sögu safnins og vill helst funda alltaf, alla daga. Tine og Nine eru á fullu að undirbúa bókverka sýningu Dieter Roths sem opnar í dag kl 16:00. Hafa þær hlaupið um eins og hvolpar um allt safnið í eins ullarpeysum frá Spak Manns Kjörum og hafa staðið sig með prýði. Sýningin verður stórkostleg og munu stúlkurnar verða til viðtals milli kl 16-18 í dag og aftur á morgun, en þær fljúga aftur til heimalands síns seint annað kvöld.

Síðasta helgin á Sviðinu

miðvikudagur, 25. jún 08:42

Hangir á spýtunni

þriðjudagur, 24. jún 14:44

G.Andý er mjög hress þessa dagana. Hún hefur haldið dampi í að mæta eldsnemma og manna hressust í (svíðandi) morgunsárið. Spurning hvort það sé Ajax drykkjan. Huginn mætti klukkan níu, sem er mjög seint í Andreu bók, og ræddu þau um næsta sýningarár, umsóknir um sýningar, félagatalið, stöðuna á bankareikningum, niðurtöku á sýningu Karls og möguleikan á að framlengja henni, stafsetningarvillu í nafninu hans á heimasíðunni sem hann varð æfur yfir, þrifplanið og væntanlega sýningu Þýzkanna á bókverkum Dieters sem opnar á föstudaginn. Huginn fór aðeins yfir texta sem þær skrifuðu og lagfærði og eru þær að setja saman lítinn bækling um verkefnið. G.Andý sendi netboðskort í dag. Í kjölfarið tók Hugo niður heimildarnar um gjörningana af rauðvínsveggnum og hugsaði um að nú þyrfti að spýta aftur í lófana með söfnun á heimlidum. Harpa Þórs er enn með efni úr arkífinu eftir heimsókn sína um daginn. Gandí fékk mail um að laga gögnin sem send voru til Ríkisskattstjóra og er hún komin með mikið leið á ársreikningnum. Hundleið. Nía er í fríi. Dúndurfríi í sólinni á Seyðisfirði. Ghandí þrufti að ná í hana í gær. Gabríela svaraði í símann og sagði að Nía væri útí sjó. Eins og selur. Unnar er á leiðinni frá Sigló, kemur á stjórnarfund á morgunn með svartfuglsegg úr Grímsey áður en hann drífur sig til Nef Jörk. Þar er hann að sýna með mörgum kanónunum í risavöxnu gallerí og gistir á Chelsea hótel, hvorki meira né minna. Dettur í það og fær sér í haus. Hver veit? Hlynur Halls kom í hádeginu og spjallaði við Hugo og Andí um væntanlega grasrótarsýningu á Hjalteyri og sýninguna sína í Nýló í ágúst. Hlynur reifaði margar hugmyndir varðandi sýningarnar. Styrkjamál voru rædd í þaula fyrir grasrótina og mikilvægi þess að smala tilvonandi sýnendum norður á eyri sem fyrst og skoða síldarverksmiðjuna, þar sem sýningin fer fram. Hryllilega spennandi og gígantískt húsnæði með skrilljón möguleika og merkilega sögu. Hún var byggð kringum 1938 og var á sínum stærsta síldarverksmiðja í evrópu. Hún var steypt um vetur svo að það þurfti að hita steypuna meðan á byggingu stóð. Sýnendur og fleiri mál eiga öll eftir að koma í ljós á næstu dögum. Hlynur mun ekki vera sýningarstjóri heldur tilnefndi hann Þórarinn Blöndal. Tinna kom um tvöleytið og heldur áfram að vinna við bókina góðu. Hún ljósritar aðalfundagerðir í massavís, skýrslur stjórnar og nótar hverjir eru í stjórn hverju sinni. Þetta er byrjunin á gagnagrunni Nýlistasafnsins um sýningahald síðastliðin 30.000 ár og góður grunnur fyrir bókina. Tinna hringdi í Jóhönnu, 25 ára gamla stúlku úr listfræðideild HÍog formaður stjórnar Artímarits og ætlar hún að vera Tinnu innan handar í þessu verkefni. Ingólfur kíkti á Þýzkurnar í enda dags og rakti úr þeim garnirnar varðandi bókverkasýninguna. Hann mun hugsanlega vera með leiðsögn við opnunina á föstudaginn en er ekki viss. Kannski verður að finna einhvern annan.

Bagettan

föstudagur, 20. jún 13:11

Þessi vika hefur ekki verið eins kyngimögnuð og sú síðasta en eru nær allir stjórnarliðar flúnir út um allt, Huginn, Lotta og G.Unnar eru að setja upp sýningu rétt fyrir utan næst stærstu borg á Íslandi Akureyri sem heitir Hlass en Huginn lét sér það ekki nægja og sýnir einnig í hinu víðfræga Dalí gallerý með ungstirninu Yohanna Hleif þar sem búast má við stófenglegri Bagettu beint úr heitum Dominos ofninum. Hvetur stjórnin alla til þessa að mæta á þessar stórufínu sýningar. Andrea og Nína urðu eftir í bænum og sitja uppi með sveitta smiði frá Yðar ósk í Svið sem vaða inn í safnið allan daginn að tengja rafmagn o.fl. Blikka þeir stúlkurnar óspart enda eru þær alltaf mættar í hælum með Gucci sólgleraugu. Lærlingurinn Elín elti hópinn norður enda er hún mikill aðdáandi verka stjórnarliðanna og gat ekki hugsað sér að missa af þessum sýningum. Áður en hún fór í frí skúraði hún safnið hátt og lágt ásamt móður sinni og glansaði það eins og eins og nýstrokinn grís þegar Andrea mætti til vinnu á miðvikudaginn. Nína hefur verið að planleggja dagskrá sviðsins næsta laugardag og verður hún aldeilis glæsileg en þar stigur á stokk Ási ásamt nokkrum vel völdum konum sem þekktar eru fyrir allt annað en tepruskap en þær eru: Sahara, Begga F., Hulda Vil og Imma. Sverrir Sveinsson prentari sem prentaði mikið fyrir Dieter kíkti við vatnsgreiddur og talaði við Dísu og co í heila fjóra tíma og kom hann með mikið af góðum sögum af kappanum og hvernig prentunin fór fram. Sýndi hann flotta mynd af Dieter að mála á ofn og hló mikið að uppátækjum hans. Óli vörður kíkti við eins og hundur í vindinum og hughreysti hópinn af sinni alkunnu snilld. Andrea er að laga bókhaldið og verða ársreikningar sendir Ríkisendurskoðun eftir helgi.

Með kúskús í hárinu

föstudagur, 13. jún 11:52

Vikan hefur verið kyngimögnuð á Nýlistasafninu. Formaðurinn kom marineraður frá Marokkó með kúskús í hárinu í alltof góðu stuði og sýndi hún Huginn og Andreu myndirnar úr eyðimörkinni og urðu þau græn af öfund. Hitti Ninski mikið af rosalega miklivægu fólki á þessum viðburði eins og Ernesto Neto sendiherran okkar frá Brasilíu, Olaf Nicholai listmann sem kosinn var 3ji besti listamður í heimi í fyrra og loks trommarann úr Queen og var Bohemian Rapsody tekið í bakaríið. Glamórinn var ekki eins mikill niðri á safni þó veðrið hafi verið gott, Ghandý fór yfir fullt af mistökum úr bókhaldinu frá því 2007 svo hægt sé að klára ársreikninga,bjakkinn Lalli Vill kom og kenndi henni á netbókhaldið. Einnig hefur hún staðið í ströngu við að rukka Listasafn Reykjavíkur um dagpeninga Karls Holmqvist fyrir að taka þátt í maraþoninu, eru þau treg að borga. Dísa skúraði safnið (óíkt formanninum sem stóð ekki sína plikt sem skúarari í síðustu viku...heldur flaug til Marokkó í vel skúrað hótelherbergi í Marakesh). Elín hefur nú skráð 202 verk og ánægð með sig. Þýskurnar eru komnar aftur ferskar með aðstoðarmanneskju frá Þýskalandi og eru þýskurnar orðnar þrjár. Vinna þær hörðum höndum að því að undirbúa Dieter Roth bókverkasýninguna sem þær eru að setja upp. Ólafur Ingi hefur verið eins og köttur úr Kattholti í Nýló, mjög hress með nýja týpu klippingu, Óli er búinn að leggja upp vinnuferli fyrir lærlinganna og Nínu, verður nú unnið með nýja málverkið. Þau eru mörg verkin og er Óli sértaklega spenntur fyrir rúllunum sem eru hér í massavís. Fyrsta rúllan sem opnuð var er frá Árna Ingólfs, klippimynd úr blómapappír sem er límd á maskínupappír, hún er rústir einar. Skoðað verður hvort raunhæft sé að gera við verkið og mun það koma í ljós á næstu dögum. Ekki hefur heyrst píp í Unnar frá Paradís og telur stjórnin að Unnar sé í alsælu með Elsu sinni. Hafa Huginn og Andrea ákveðið að senda formanninn með rútu þangað með bundið fyrir augun. Tinny er á milljón að undirbúa Nýló 30.000 ára bókina og er hún mjög hörð á stjórnarliðum að láta til sín taka í þessu verkefni. Ekkert hefur heyrst frá Birtu nema að hún hefur vingast við risastóra kanónu úr listheiminum í útlandinu og myndar hún tengslanet eins og kolkrabbi á meginlandi Evrópu. Lotta okkar er að standi sig eins og hetja í malmö þessa daganna að setja upp permanent verk eftir sig í sjúkrahúsi þar í bæ. Verkið verður sett upp á bráðavaktinni til þess að hafa róandi áhrif á sjúklinganna. Mikil aðsók er að komast að á sviðinu hans Karls Holma og má búast við sprengjudýrð núna á laugardaginn. Hvetjum við alla félagsemnn til að láta sjá sig, bæði um helgina og dag frá degi til þess að sýna samhug í verki:-)

Sviðið síðustu helgi

miðvikudagur, 11. jún 14:08

Huginn las upp allar sýningar,sýnendur, umsjónarmenn og aðstoðarmenn og af hvaða tilefni sýningarnar voru frá því að Nýlistasafnið var 10 ára 1988 til ársins 1993 þegar safnið varð 15 ára. Þær er að finna í 15 ára afmælisbækling Nýlistasafnsins sem Birgir Andrésson sá um að hanna.

Hugleikur Dagsson las 2 ljóð eftir sjálfan sig, annað var klámfengið en hitt söng Hulli hástöfum og fjallaði um litlu stúlkuna með eldspíturnar.

The mysterious Richard Foley las í lófa áhorfenda við mikinn fögnuð og talaði fólk um mikla hæfileika Richards.

Sigurlaug Gísladóttir fór frá hvísli yfir í hátíðni öskur í gegnum míkrafón og ýmsar tölvugræjur, svo að safneignarhillurnar skulfu.

Gunnhidur og Kristín Ómars lásu upp ægifagran ljóðsbálk eftir Gyrði Elíasson, dagurinn sem fannst ekki á almanaki. Eftir langa þögn hóf Kristín lesturinn og las hún alla hlutanna nema einn. Á meðan skalf Gunnhildur og titraði með tárin í augunum.

Sviðið svið

mánudagur, 9. jún 12:21

Rosaleg stemming var á sviðinu á laugardaginn. Richard var góður í að veiða fólk inn; gesti sem komu fyrir tvö en komu aftur. Richard er mjög sannfærandi og prýðisgóð yfirseta. Berglind mætti rétt fyrir tvö og komu þau vídeóvélinni upp, hlóðu batteríin í myndavélina og festu flössina á hana. Berglind var með risaflöss. Heil gervitungl. Dagskráin byrjaði þegar Kristín Ómars og Gunnhildur komu. Huginn var kynnir og fyrir fullu húsi kynnti hann þæt til leiks. Kristín og Gunnhildur komu uppá svið (úr Játningarklefanum), stilltu gullitaðri klukku á sviðið og settust í sinn hvorn svartan klappstólinn. Svo var löng þögn. Kristín horfði á Gunnhildi sem starði á gólfið. Mjög löng þögn. Þangað til að Kristín hóf að lesa ljóðabálkinn "Dagurinn sem finnst ekki á almanaki" eftir Gyrði Elíasson. Við hverja setningu skalf Gunnhildur og eftir nokkur ljóð var hún farin að gráta. Tárin runnu niður kinnarnar og flassið frá Berglindi endurvarpaðist í tárunum. Kristín rétti Gunnhildi bókina og las hún seinasta ljóðið gjörsamlega á bláþræði. Huginn kom á sviðið sviðið og bauð Hugleik velkominn en hann var ekki mættur og hringdi Davíð Örn neyðarsímtal. Hulli var á leiðinni svo að Huginn ákvað að lesa sýningarsögu Nýlistasafnsins frá því að safnið varð 10 ára og þangað til að það varð 15 ára 1993. Las Huginn upp allar sýningarnar, hverjir sýndu, hvar í húsinu á Vatnsstíg 3b viðkonadi sýningar voru, af hvaða tilefni (ef það átti við) og hverjir voru umsjónamenn sýninganna eða aðstoðarmenn. Upplýsingarnar var að finna í 15 ára ammælisbækling safnsins. Gaman er að segja frá því að Biggi Andrésar sá um hönnun bæklingsins. Loksins var Hugleikur mættur og fór hann með tvö löng ljóð eftir sig. Eitt klámfengið úr Breiðholtinu og annað um Litlu stúlkuna með eldspýturnar, sem var líka klámfengið en þó aðallega dramatíkst og sorglegt. Hugleikur söng hástert um Litlu stúlkuna og framdi ýmiskonar búkhljóð. Hugleikur var jafnframt klæddur í peysu sem hann stal úr Vinnuskólanum í Reykjavík. Huginn þurfti svo aftur að fylla í götin á meðan Silla tengdi græjurnar fyrir sinn gerning. Sem betur fer var hluti af snúrulandsliði Íslands á svæðinu (Gunni Tynes og Árni plús einn) og eftir um fjörutíu mínútur gat Silla byrjað. Þá hafði Huginn lesið nokkra góða úr Fluxus Performance Workbook og sagt sögu George Maciunas (sem Karl ljósritaði á fullu fyrir sýninguna sína). Silla var með allskonar delay græjur, sampler og hvaðeina og fór hún hægt og rólega frá hvísli yfir í hátónaöskur sem hún tók upp jafnóðum og spýtti útúr tölvunni (gegnum græjurnar). Úr varð samfelld hljóðhrina sem hristi safneingnina og framkallaði hellu hjá áhorfendum. Mystic Foley eða Richard Foley las í lófa meðan að Silla öskraði og Huginn fyllti í götin á sviðinu. Foley er eins og áður segir afar sannfærandi og stakk hann svo djúpt á ýmsum kýlum inní Játningarklefanum að gestum sveið.

Fólksflótti

föstudagur, 6. jún 16:18

Andrea mætir nú galvösk alla morgna klukkan 6.30, hitar upp fyrir daginn með leikfimiæfingum og þrifum þangað til að hún hefur skrifstofustörf sín. Andrea er búin að skipta vinnudegi sínum í þrennt; æfingar og þrif, skirfstofustörf og svo á vinnustofuna að sinna kúnstinni. Það gerir hún vegna þess að tilboðunum hefur nú ringt inn á hana eftir glymrandi suxsex yfir Listahátíð. Gallerí á vestuströnd Bandaríkjanna hafa þreifað á henni sem og á Spáni og Ísrael. Andrea er farin að hóta uppsögn þar sem hún hefur engan tíma lengur fyrir Nýló. Nína flúði til Marokkó í bullandi fimmtugsammælis-sósu hjá Bayonneskinku von Habsburg. Þvílík gleði, jafnvel um of þar sem Nína var nýstiginn úr mega pródúksjón hjá Palais de Tokyo í París. Þar var maðurinn hennar með heila byggingu úr rusli sem var í senn bar og hvaðeina. Unnar flúði líka. Á paradísina Siglufjörð. Þar verkar Unnar skreið fyrir sýningu sína í plássinu og í hlöðu við veitingastaðinn Halastjörnuna í Öxnadal. Huginn er að reyna fá til að berja og forma skreiðina í buxur, boli, pils og fleira en hann er ekki viss um svoleiðis tvist og sakar Huginn um að troða sér inní vinnuferlið sitt þar sem að hann sé ekki með neina hugmynd sjálfur fyrir þessa sýningu. Það finnst Huginn ósanngjarnt, en er samt með enga hugmynd fyrir hlöðuna. Svo á endanum flúði Karlotta til Svíþjóðar. Þar er hún að setja upp varanlegt verk eftir sig í spítala í Malmö. Lítið fer fyrir Tinnu þessa dagana í safninu en sendir hún þó nokkra pósta á dag frá heimili um fyrirhugað rit sitt um 30 ára sýningarsögu Nýlistasafnsins. Tinna fékk myndarlegan styrk úr bókmenntasjóði fyrir ritinu og er hún að móta vinnuferlið; hugmyndir, ritstjórn og fleira. Ármann Agnarsson mun verða grafískur hönnuður, stjórn situr sem stendur í ritnefnd og hefur Tinna sankað að sér áhugasömum úr fræðigeirum jafnt og myndlistarheiminum. Þorvaldur mætir nú á hverjum degi og grúskar í grófflokkuðum bókverkunum. Hugmyndir hans styrkjast þar með á hverjum degi. Ingólfur kíkti til hans og fóru þeir saman yfir hauginn með Dísu, Elínu og Richard. Sögðu þeim allt sem þeir vissu um hin og þessi verk. Dísa og Elín fundu stóra pappamöppu merkta Rósku sem er full af ljósrituðum textum, teikningum, ljósmyndum, ofl, og ákvað Huginn að það yrði bundið saman, eins og augljóslega hefur átt að gera. Ritið var græjað í einum grænum og bíður nú að vera gormað saman. Richard er að fara yfir erlendu vídeóspólurnar og forskrá hvert eitt og einasta stykki. Í gær fór hann á hverja vídeóleiguna á fætur annari til að fá tóm vhs-hulstur. í dag komu margir góðir gestir; Markús Anders kom og tók satínið úr verkinu hans Ragga til fyrir sendingu vestur um haf og Mary frá Performa hátíðinni slefaði yfir sýningu Karls Holmqvist og rak augun í gjörningarkífið. Hún kannaðist við ILC og vildi meina að þær yrðu hluti af Performa á næsta ári! Prófessor við Rutgers Universtity og finnsk kona hans sem er listakona komu og vissu mikið um íslenska listasögu. Huginn spurði hvort þau þekktu Möggu Blöndal eða Magga Sig. Þau könnuðsut við þau en kallinn hafði ekki kennt þeim. Hann er prófessor í grafískri hönnun við Rutgers. Óli Lár var sendur í Játningarklefann í gær, Hann var mjög hress og það kjaftaði á honum hver tuskan; um kúnstina, SÚM, Mynd og Hönd, púra expressjón, gerninga og hundakúnstir. Áslaug Thorlacius frestaði játningum sínum yfir helgi og Rúrí mætir á mánudaginn. Á morgunn verður rosa stuð á sviðinu hans Karls. Kristín Ómarsdóttir og Gunnhildur Hauks munu leiklesa ljóðabálk, Hugleikur rappar, lærlingurinn Richard mun spá í lófa gesta og Mr. Silla ætlar að öskra í hálftíma (en byrjar í hljóði). Svo er aldrei að vita hvað gerist enda hafa ýmsir hótað uppákomum.

Formaðurinn og stjórnarliði takast á

mánudagur, 2. jún 09:30