Nýlistasafnið - The Living Art Museum

miðvikudagur, 16. des 17:15

Dagurinn í dag var með þeim rólegri í Nýló, eiginlega bara grunsamlega rólegur, enda eru framkvæmdir í rýminu í biðstöðu sökum sílan-áburðar (gólfefna-vörn, fyrir óinnvígða), sem ekki má ganga á og fylgja óæskilegar eiturgufur, svo stjórnarmeðlimir fóru í vímu af og fabúleruðu fáránleg nöfn fyrir 30.000 ára sýningaryfirlitsbókina, sem þjóðin bíður auðvitað spennt eftir að komi út.

Útgáfa bókarinnar frestast aðeins og verður gefin út laugardaginn 20. febrúar 2010, um leið og hið nýja rými Nýlistasafnsins, að Skúlagötu 28, verður formlega opnað.

Stjórnarfundur var í gær og nokkrar mikilvægar ákvarðanir teknar í góðu geimi. Þetta lítur rífandi vel út og við erum full spennings og tilhlökkunar.

Í dag var bara rosa venjulegur dagur á forstjóraskrifstofunni á 3.hæð, kaffi þambað og mörgu praktísku komið í verk.

Erling Klingeberg kíkti við og leist vel á. Nokkrir aðrir góðir félagsmenn hafa litið við uppá síðkastið og verið ánægðir með stöðuna, s.s. Magnús Pálsson, Ingólfur Arnarson, Steingrímur Eyfjörð og Magnea Ásmundsdóttir.

Á morgun munu Birta og Gunnhildur taka til við að múra heilan vegg í aftara rýminu og búast við að massast við það.

Haukur frændi Gunnhildar mun lappa uppá glugga rýmisins á meðan. Hlustað verður á jólalög og hver veit nema boðið verði uppá smákökur, frá Frón, fyrir duglega iðnaðar-listamenn…

Skúlagata 28

þriðjudagur, 8. des 16:11

Nú verða tryggir lesendur Dagbókarinnar að sjá aumur á okkur. Sökum flutninga og gífurlegra anna hafa öll skrif setið á hakanum. Hér hefur mikið gengið á. Nýlistasafnið er ennþá að flytja, öll starfsemin er komin niður á Skúlagötu, netsamband er komið á og símalína tengd. Hvað er hægt að biðja um meira?

Við tókum við kexverksmiðjunni Frón og hreinsuðum út úr henni risastórum ofnum, hámuðum í okkur kex og drullu, ásamt iðnaðarmönnum og örfáum en öflugum velunnurum. Nú er að komast mynd á þetta. Það er verið að gangafrá gólfi og veggjum, pússa, spúsla, splæsa, smíða, mála og dútla.

Safneignin hefur á meðan tímabundið fengið að hreiðra um sig á þriðju hæð, innpökkuð í baðmull og dún. Við hlið safneignar er fyrrverandi skrifstofa Frónforstjóra og þar hafa tölvukostur og gögn skrifstofunnar tímabundið tekið sér bólstað með andríkar umræður um framtíðna svífandi yfir vötnum.

Stefnan er að Bókin komi út 23. janúar og þá verða dyrnar á Skúlagötu opnaðar uppá gátt með guðaveigum. Það verður alltsaman nánar auglýst síðar.

Gólfið - Before and after.

Flísalögn í farvatninu. Flísa uppvask.

Óli hreinsar flísalím.

Við vöskum upp hverja einustu flís.

Líkt og værum við hermenn í refsingarvinnu. Ekki ósvipað t.a.m kartöfluskræli.

Skrifstofan tímabundna en vel teppalagða.

Tinna heldur utan um málin, en hver heldur utan um Tinnu.

Forstjóraútsýnið, milljón dollarar.