þriðjudagur, 31. mar 17:11
Víglsa Leirpottsins á föstudaginn var glymrandi. Borðið og Sigga Leir7 mössuðu nýþrykkt og munstruð viðarlangborðin inní sal, gegnu frá græjunum og skrúbbuðu gólfin eftir SS með Rössunum, báru smá grænt Hreinol á pallinn, settu upp skjávarpa og sýningartjald þar sem vespa sást móta fullkomið leirker. Vespunni var parað við leirkerasmið að renna ker. Bæði kerin voru alveg eins. Náttúran og maðurinn renna saman í grunnformið á leirkeri. Pési Útúrdúr klippti vídeóið saman. Huginn tengdi græjurnar og færðu þau Karlotta sýningarborðin og tóku plakötin og stöffið frá Bag of Joys af langa veggnum. Brynhildur smíðaði lítinn stöpul með krækiberjalyngsþrykki á (eins og langborðin) og stillti sýningarpottinum upp. Leirpotturinn er einnig þrykktur með lyngi og standa berin út úr pottinum. Eins og lambabein, sem glúbbast út. Á lokinu eru Baldursbrár. Það er eins og leirnum hafi verið hnoðað hressilega saman á túndrunni utan um beinin. Finna hringdi í Pétur Musician og bað hann að spila í Vígslunni. Það var gos í Pepsi og stillti hann upp græjunum rétt fyrir vígslu og setti rússneska moog tónlist á fóninn. Friðrik V eldaði sem mest hann mátti yfir daginn og kom hann pínku seint með kássuna í ótal Leirpottum. Svona töff seint. Mikill spenningur myndaðist þegar hann kom prúðbúinn með þjón og hófst þá vígslan formlega. Pepsi var þá fljótur að skutla í Mozart og kynning á verkefninu fór fram. Ræddu Finna, Brynhildur og Sigga um íslenskan leir, landnámskindur, sjálfstæða framleiðslu, beint úr héraði og beint frá býli. Friðrik greip orðið og talaði um lambakjötsframleiðslu, lamb alið á hvannarót, tilraunastarfsemi með matvæli, samstarf við Finnu og Brynhildi, bróðir sinn þjóninn og uppskriftina sem borin var fram og mun fylgja pottinum þegar fest er kaup á honum og kynnti Friðrik einnig bjórinn sem var í boði en hann er, eins og leirinn, framleiðslan og hvannarótar lambið af Snæfelllsnesinu (leirinn og lambið úr Fagradal). Slefið rann á langborðið og var rifið í sig. Gestir sáu um að skammta sér í bambuskálar úr Leirpottunum við kertaljós. Það var vel mætt og margt um góðan gestinn. Reyndar svo margt að færri komust að en vildu.
mánudagur, 30. mar 11:54
Hér er linkur á Bratmobile að taka There´s no other way með Blur. Upptakan er frá 1993.
http://www.youtube.com/watch?v=of_EzjtNar0
mánudagur, 30. mar 11:41
Fjórða SS-kvöldið var haldið með pompi og pragt á fimmtudaginn var. Með Kolrassa Krókríðandi. Fjölluðu þær um hljómsveitina; upphafið og unglingsár; veruna í FS og reynslu sína pungsveittum Bítlabænum. Sem andsvar og rýting stofnuðu þær hljómsveitina Menn og spiluðuð Led Zeppelin cover (minnir pinku á "feitu" riot grrl stelpurnar í Bratmobile sem tóku Blurlög). Systir Elízu, söngkonu og fiðluleikara, sendi þeim kassettur frá USA með upptökum úr háskólaútvarpinu. Þannig kynntust þær amerískri og breskri nýbylgju. Td Ride og tóku þær Chelsea Girl reglulega á tónleikum eftir að Kolrassa var stofnuð. Nafnið varð til í félagsfræðitíma og skráði vinur þeirra úr dauðarokkshljómsveitnni Inflamatory í Músíktilraunir med det samme. Hippinn og nýbylgjan runnu saman í þverröndóttar mussur og gítarvegg og unnu þær öruggan sigur í tilraununum ´92, innan um allt dauðarokkið og þar með talin vininn góða sem lenti í öðru sæti. Vildu þær meina að þær hefðu drepið dauðarokkið. Við tók djúpa laugin og var Kelfavíkureinangrunin og Bítlapungurinn rofinn. Upphitun á lokatónleikum Sykurmolanna, Hemmi Gunn, KókRokk og hvaðeina. Með Bubba, SSSól, Toddurunum. Þær kynntust nýbylgjununum í Reykjavík sömuleiðis og stofnuðu m.a til FIRE félagsskaparins með Púff, Stilluppsteypu og Curver. Haldnir voru tónleikar í nafnis klúbbsins, flutt inn nokkur pönkbönd (God is my co-pilot og Dog Faced Hermanns) til að safna pening í útgáfu. Smekkleysa gaf Rössurnar út, á endanum þrjár plötur. Elíza, Bíbí og Sigrún rúlluðu snarpt og skorinort yfir fystu ár hljómsveitarinnar. Spiluðu demo, vhs upptökur af tónleikum sem Bíbí hafði farið með í myndbandavinnsluna og fært yfir á dvd í tilefninu og sýndu ógrynni af plakötum sem þær eða vinir gerður fyrir hina og þessa tónleika. Þær sögðu svo hreinskilnislega frá áherslum í og breytingum á starfsemi hljómsveitarinnar og sköfuðu ekkert af meikdraumum og risahugsjónum. Þegar útrásin hófst með Bellatrix. Mistökum og fíflalátum á ögurstundum. Einnig veittu þær áhugaverða innsýn inní í óháðan en ímyndasmíðaða tónlistarútgáfu og markað á Bretlandi, hvernig sá heimur er byggður upp, hvaða áhrif sá strúktúr hafði á hljómsveitina sem og áhrif popppressunnar (NME, Melody Maker). Á endanum töluðu þær loftleysi og áhugaleysi. Hvernig tennurnar runnu út eftir að hafa markvisst misst stjórn á eigin framvindu, framleiðslu og jafnvel sköpun.
þriðjudagur, 24. mar 17:34
Í morgunn var afar rólegt. Andrea var ein. Sendi út tvær fréttatilkyningar, svaraði laufléttum tölvupóstum og hringdi í Guðmund hjá Fagvali vegna nýrra hurðastanda. Þeir gömlu eru ónýtir og vill hún fá þá bætta þar. Standarnir voru keyptir á 30.000 kall fyrir jól. Nína kom seint og síðar meir með Drekaloku og byrjaði á því að vígja nýjan meðlim í saumaklúbbinn sinn; eina karlmanninn, Danna Bjö. Héngu þau inná Hangsi sem aldrei fyrr og reyktu heilt karton af grænum Gold Coast. Andrea náði þó að skella formanninum í nokkur brýn verkefni m.a að tala við prentara og pappírssölur fyrir 30,000 ára bókina um starfsemi Nýlistasafnsins. Kom á daginn á pappírsmanneskjan er dóttir Jóns Gunnars og var hún afar ánægð að Blómið væri nú til sýnis á samstarfssýningu NÝ og LÍ. Næsta verkefni var að mála meira en Nína var fljót að gefast upp á því og langaði frekar í aðra Drekaloku. Nína hljóp svo út um 4 leytið og óskaði öllum góðs gengis í kvöld. Ekki er alveg á hreinu við hvað hún átti við. Karlotta sendi upplýsingar og formlegt boð á Sýna og sjá til Árna Matt og fleiri spekinga. Það er nauðsynlegt að fá viðkomandi aðila á kvöldin til að hjálpa til við krufinguna og heilunina. Hún tók svo til með Huginn og Andreu, kláraði að hengja upp plaköt og setja dót í sýningarborðin frá Böggunum. Sigga Nanna eiginkona Músa Bagga, kom og náði í tölvuna og hafði ætlað sér að ná í góssið líka en kom að þeim undir gleri og uppá vegg. Ívar jlósmyndari sendi safninu filmuskann af tónleikum Bruna BB og ákvað Karlotta að skannið skilda verða að plakati í A1 stærð. Masónítvinnuborðin voru færð innar í vinnurýmið hjá safneigninni til að forðast sólina en stjórnin var að brenna upp til agna við gluggana. Unnar sendi Nýló undarleg skilaboð, tímarit, að handan en Unnar er víst í eyðimörkinni í Arizóna að leita að Jim Morrison á bullandi meskalíntrippi. Það voru kannski þessi tímarit sem rugluðu formanninn í rýminu? Berlínarbollan sem Markús sendi með Karin Sander lét standa á sér og fór því bakkelsið sem Andrea hafði keypt beint í ruslið. Hún hafði frétt að bollan væri vitlaus í snúða. Kolrössur eru alla að spennast upp fyrir Sýna og sjá kvöldið sitt og það sama má segja um boðsgestina á feisbook. Staðfestingum rignir inn og verður kvöldið útúrtroðið. Uppá bak. Að gefnu tilefni vill Andrea breyta yfirskrift verkefnisins og kalla það Séð og heyrt. Curver er líka sjóðandi heitur og bókaði hann kvöld sjöunda maí.
þriðjudagur, 24. mar 11:51
Nýja skólastofan var formlega tekin í notkun í gær. Andrea færði einu borðtölvu safnsins yfir á masónítplötuna og hefur hún aldrei verið ánægðari. Ninski kom fersk inn eftir helgina og fundaði í massavís inni á hangsi með gömlum og góðum vinkonum sem eru að hugsa um að stofna nýja saumaklúbb. Bræðurnir BB sem eru núna bestu vinir Andreu eftir að þeir gáfu henni tvö Nýló lógo til þess að setja við aðalinngang safnsins, litu við með nýja límstafi sem þeir skelltu upp á vegg við mikinn fögnuð Nínu. Reynt var að finna nýjan skjávarpa í gegnum andlistsbók, en safninu brávantar einn nýjan eftir að sá gamli góði brann yfir á einu af Sýna og Sjá kvöldunum. Það þarf líka að fán einn ansi öflugan fyrir hana Yrsu sem er líka nýja besta vinkona safnsins, en hún ér að setja saman dagskrá af heimildamyndum sem sýndar verða eftir páska og fram á sumar. Huginn mætti í hádeginu og byrjaði á því að labba marga hringi í kringum nýju skólastofunum og bað nýja einkaritarann sinn Andreu um að senda nokkra pósta m.a á Kolrössurnar sem eru að missa sig yfir því að hafa verið valdar til þess að segja frá á næsta Sýna og Sjá kvöldi. Lotta hékk inni á andlitsbók og auglýsti viðburðinn á fullu, en á sama tíma las hún yfir ísl og enskan texta um safnið í 100 asta skiptið, en samkvæmt G.Unnari verður hann að vera gallalaus og fullkominn áður en hann fer upp á vegg. Komst Lotta þó að því eftir smá athuguna að þessi blessaði texti er mjög earlie ninties, en eins og öll þjóðin er safnið greinilega u.þ.b 20 árum eftir á. Dr. Gunni kíkti við með gamalt Spice Girls plakat til þess að gefa safninu og vildi í staðin fá Huginn og Karlottu til þess að velja bestu skemmtistaði og gallerý landsins fyrir nýja skáldsögu sem kappinn er að fara að gefa út á vormánuðum. Huginn hrífst mjög svo af hinum nýja stað Karamba en Karlotta hamraði mikið á því að Gallerí Túrpentína á Skólavörðustígnum sé málið. Gunni hvarf á braut og við tók Sara Bjö. með nýjan stíl. Minnti hún Andreu mjög mikið á Tracy Enim enda eru þær nákvæmlega jafn góðar listakonur. Vefsíðan var uppfærð eins og alltaf á mánudögum og þess má geta að www.nylo.is hefur verið tilnefnd til hinn virtu Leopard Swarowski verðlaunanna en meðal þeirra vefsíðan sem hafa hlotið þessi verðlaun eru www.artforum.com/diary sem Nýló heldur einmitt mjög mikið upp á.
mánudagur, 23. mar 11:12
föstudagur, 20. mar 11:59
Baggarnir rúlluðu SS upp í gær fyrir fullu húsi. Músíkhvatur, Lena og Gústi settu fjórða meðliminn á skæpið frá Svíþjóð (svona eins og þegar Einar Ö söng í gegnum símtól frá útlöndum á Kukl tónleikum minntist Gunni vinur Hugins á) og fóru skýrt og skilmerkilega í gegnum feril sinn, útgáfur, plakatagerð, umslagagerð og textagerð. Sumt var U með í Svergie og tróð á skjáinn. Allt frá stofnun í Seljaskóla uppúr þónokkrum böndum og kom td á óvart að Unnar (á tölvuskjánum frá Svíþjóð) kom úr dauðarokksbandi. Lærði þar að spila djúpan bassa sem svo varð forsenda allra bassalína sem hann samdi fyrir Bag of Joys. Nafnið kemur af lógói á hláturpoka sem Gústi hafði fengið úr brandarabúð og hengu krakkarnir mikið í Gróttu til blása lífi í pokann. Listrænir sem þeir U, G og M voru þeir duglegir við að gera kollage og teikningar fyrir dreifiefni og plötu/kassettu cover. U er jafnframt mikill safnari á ýmiskonar dót; vísinda-náttúrufræði og efnafræðibækur, nammibréf, teiknimyndasögur og fleira og allir eru þeir miklir grúskarar á tíðarandann og tónlist svo að grunnur þeirra til að skapa ímynd sína úr var ríkur. Bandið æfði, tók upp og hékk saman í bílskúrnum í Jöklaselinu í Breiðholtinu; heima hjá Unnari. Þorsteinn félagi stofnaði bandið með þeim þremur en hætti 1995, þá orðinn leiður á hljómsveitarveru sinni og upplýstu M og G að hann hafi í rauninni aldrei getað spilað í réttum takti eða tón. Þorsteinn var hinsvegar drjúgur í textagerðinni og á textann við lagið Lovepotion sem kom út þónokkru eftir að hann sagði skilið við hópinn. Lena kom inn eftir það og sagði gestum frá því að hún var látinn syngja Big in Japan með Alphavile í inntökuprófinu. Það er uppáhaldslagið hans U. Félagi þeirra var einnig látinn syngja það í leyni, sem Lena vissi aldrei. U uplýsti það á skæpinu. Leiðindamál. Kristinn Gunnar Blöndal var einnig í þessu inntökuprófi og reyndi að tromma betur en trommuheilinn þeirra, sem alltaf var notaður. Það gekk ekki. Líka leiðindamál. Sérstaklega þegar upptaka sýndi Óla Björn massa eitt lag með Böggunum ásamt hljómsveitinni Rúnk sem upphitun á comeback tónleikum B of J í Kaffileikhúsinu árið 2001. Hann gat trommað 200 bpm, eins og heilinn. Til að sanna það, sýndi Gústi glósurnar sínar sem sýndu allar upplýsingar um hvert eitt og einasta lag með B of J. Við hvert lag mátti sjá hljómborðsnóturnar, númer á effektum og hljóðum úr græjunni og hversu hratt hann átti á stilla heilann. Mjög fallegar og ítarlegar glósur. Þau sýndu jafnframt tilraunaupptökur fyrir heimildamynd sem vinur þeirra í fjölmiðlafræði í FB tók í æfingahúsnæðinu í Jöklaselinu. Myndin var skólaverkefni sem var aldrei klárað og miðar að því að sýna bandið eins og það væri að spila á tónleikum á ímynduðum stað og setti vinur þeirra sig í hlutverk blaðamanns/ sjónvarpsmanns sem tekur viðtöl fyrir og eftir tónleikana. Hann brá sér einnig í hlutverk kynnisins og kynnir bandið á ensku. Svo var líka sýnt viðtal og tónleikaupptaka úr sjónvarpsþættinum Ó sem Markús Þ. A og Selma Björns sáu um sælla minninga. Markús var dúndur sjónvarpsmaður. Einnig til að setja tímann eða tímabilið sem hljómsveitin starfaði á í samhengi sýndi Múskíkhvatur sjónvarpsauglýsingu Sjálfstæðisflokksins fyrir alþingiskosningarnar 1995. Þar lýsir Davíð O svarthvítum afarkostum sem kosið verði um: Uppbyggingu til framtíðar með tveggja flokkastjórn xD eða sundrungu, afturhaldsemi og niðurlægingu með fjögurra flokka vinstristjórn. Bag of Joys var alltaf lýst sem kærleysislegu leikskólapönki og reið ekki feitum hesti á síðum gagnrýnenda. Barnæsku og barnalegheitum var fleygt í orðræðunni í kringum hljómsveitina. Þau gáfu út stóra plötu hjá Smekkleysu í Skært lúðrar hljóma seríunni 1997 og hættu uppúr því. U var þá orðinn forfallinn efnafræðingur og Lena upptekinn við önnur störf svo að sveitin rann aftur útí Gróttusandnn. Oní hláturpokann. Á útgáfutónleika fyrir alla Skært lúðrar hljóma seríuna mættu M & G og fóru meirihluti tónleikanna í að M var kenna G laglínur á hin hljóðfærin.
þriðjudagur, 17. mar 17:17
Nína var mætt galvösk í morgun en ekki svo brún eins og vonast hafði verið til. Nía fór bara einu sinni í sólbað. Hún brann og fór ekki aftur. Hinsvegar hafði hún farið í handsnyrtingu og nudd á JFK á leiðinni heim. Nínu fannst tilfærslan á skrifstofunni utí sal stórkostleg og var ekki lengi að panta búkka og þykkar tréplötur til að nota sem vinnuborð. Andreu leist vel á það og tók til við að panta límstafi til merkinga á sérsvæðum í safninu; td Gjörningasafn og fyrir listamannareknu rýmin (skjalasöfnin). Eins útbjó hún skjöl til útprentunar með textunum og þýðingunum frá Birtu og Unnari. Hildur heldur ótrauð áfram að skrá og skrá og leitar að heimildum í rannsóknarverkefni sitt í safnafræðum. Verkefnið er um skráningarferlið í Nýló. 30.000 ára bókin er soldið í pattstöðu núna, eða frekar í dvala reyndar. Nína talaði við Háskólaútgáfuna um ritið og vilja þeir fá eitthvað á pappír um málið. Ekki gekk að sækja um til Bókmenntasjóðs tvisvar i röð fyrir sama verkefnið. Huginn hitti Hannes Lár eftir hádegi og kom hann með fullt af slidemyndum af íslenskum og erlendum performönsum. Hannes hafði sankað þeim að sér gegnum tíðina og tók sumar myndirnar sjálfur (af þeim íslensku). Hannes og Huginn töluðu lengi saman meðan flett var í gegnum bunkana; um sögu gjörningsins, Urs Luthi, transexualisma, Cindy Sherman, Allan Karprow, Sigga Gúmm og draumatímabilið í íslenskri myndlistarsögu; 1969 til ´72, þegar allt á að hafa gerst og horft var útvortis, Fræði og framkvæmd í LHÍ, ljósaboxið hans Bigga A sem Árni Páll smíðaði og daglegan performans Bigga kringum borðið og muninn á þykkt bókanna hjá Ollie Pedersen og Matthew B. Karlotta lakkaði nýju vinnuborðin á meðan og kláraði að skanna kassan hans Magga Strump. Haffi Haff kíkti í heimsókn og kynnti sér dagskránna fram á vor. Tilkynnti hann stjórninni að hann hafi sagt sig úr leshópnum í kringum fræði Múffunnar, en honum fannst díalógurinn of mikið froðusnakk. Finna kom og mælti fyrir leirpottaveislu og performans Borðsins á Hönnuardögum og var með ýmis praktísk skilaboð frá Friðriki V vegna eldhúsmála. Danni Hugveita og Klingari mætti að heimsækja Nínu sína og var afar spenntur að heyra ferðasöguna. Klukkan hálf fimm voru útsendarar Félags leikskálda og handritshöfunda til að koma upp sviðinu á Sviðið fyrir málþingið í kvöld. Í enda dagsins sendu Andrea, Huginn og Lotta út fréttatilkynningar fyrir SS með Bag og Joys. Kolrössur höfðu samband og bókuðu sig fyrir næstu viku en Jói hefur ekki tíma til að hóa saman Daisy Hill Puppy Farm. Hinsvegar næst ekkert í analóginn Orra, en Huginn á erindi til Dags til að fá bolla af sykri lánaðan og mun reyna að snúa uppá handlegginn á honum. Þess má geta að Karlotta og Huginn fóru mikinn við að ræða hugatakið opinn vettvangur, hugmyndina um lýðræði og þá í samhengi við Nýlistasafnið, hvað það er að vera óháður, forsendurnar fyrir Sýna og sjá og Einar Ö og Muggison í Brussel.
mánudagur, 16. mar 17:45
mánudagur, 16. mar 12:35
föstudagur, 13. mar 13:15
miðvikudagur, 11. mar 17:25
miðvikudagur, 11. mar 16:41
miðvikudagur, 11. mar 12:14
mánudagur, 9. mar 17:40
mánudagur, 9. mar 11:42
mánudagur, 9. mar 11:39
mánudagur, 9. mar 10:56
miðvikudagur, 4. mar 11:20
þriðjudagur, 3. mar 17:23