6. BINDIÐ - KATRÍN INGA JÓNSDÓTTIR HJÖRDÍSARDÓTTIR HIRT
18.05.2013 - 25.08.2013
Það er Nýlistasafninu sérstök ánægja að kynna einkasýningu Katrínar Ingu Jónsdóttur Hjördísardóttur Hirt 6. bindið.
6. bindið er sýning sem byggir á verkum listamanna og skrifum fræðimanna sem Katrín hefur valið í því skyni að skilgreina samtímalist út frá þeim áhrifum sem samtíma listsamfélagið á Íslandi hefur haft á hana. Markmiðið er að gera „samsýningu allra íslenskra samtímalistamanna“ og með því, vekja hugleiðingar um fagurfræðilegt og pólítískt samhengi myndlistar. Katrín hefur handgert nokkur hundruð skúlptúra í formi verðlaunabikara sem hún nefnir Þakkarskúlptúra. Hún hefur ritað bréf til ,,allra íslenskra samtímalistamanna“ og fræðimanna sem hafa með myndlist að gera og óskar eftir skiptum á Þakkarskúlptúr og verki eftir þá á sýninguna. Hún hefur sjálf valið þátttakendurna, er hún telur vera „íslenska samtímamyndlista- og fræðimenn“.
Katrín stendur fyrir verðlaunafhendingu á opnunardaginn 18. maí klukkan 19:00 þar sem lista- og fræðimenn veita Þakkarskúlptúr viðtöku.
Nánari upplýsingar um sýninguna er hægt að finna hér.
Dagskrá 6. bindis:
Laugardagur 18. maí
Opnun og verðlaunaafhending og fyrsta útgáfa ritsins 6. bindið.
Laugardagur 1. júní
Önnur og endurskoðuð útgáfa ritsins 6. bindið, sýningin endurskoðuð og getur tekið breytingum.
Laugardagur 15. júní
Þriðja og endurskoðuð útgáfa ritsins 6. bindið, sýningin endurskoðuð og getur tekið breytingum.
Laugardagur 13. júlí
Leiðsögn um sýninguna og upplestrar úr ritinu 6. bindið.
Laugardagur 24. ágúst, Menningarnótt
Viðburður í tengslum við sýninguna og lokahóf.
NÝLISTASAFNIÐ Í MALMÖ KONSTHALL
03.05.2013 - 18.08.2013
Sýningin 24 Spaces (24 Rými) er síðasta verkefni Jacobs Fabricius sem aðal sýningarstjóra Malmö Konsthall. Til þátttöku í verkefninu var boðið listamannareknum rýmum á Norðurlöndum, sem hluta að skoðun á vægi þeirra í menningarumhverfi svæðisins. Nýlistasafnið sýnir verk eftir Charles Gaines (Bandaríkin, 1944), Hans Rosenström (Svíþjóð/Finnland, 1979), Deirdre M. Donoghue (Írland/Finnland, 1971) ásamt fjölmörgum bókverkum eftir meðlimi Nýló.
Nánari upplýsingar um sýninguna má finna hér .
VALDABARÁTTA - GJÖRNINGUR OLGU KISSELEVU
02.05.2013
LornaLAB og Nýlistasafnið í samvinnu við Háskóla Íslands, kynna gjörning Olgu Kisselevu, Power Struggle – Valdabarátta, sem fluttur verður 2. maí klukkan 20:00 í Nýlistasafninu.
Olga Kisseleva nálgast verk sín á svipaðan hátt og vísindamaður. Hún spyr spurninga um félagsleg málefni, setur fram kenningar, gerir tilraunir og kemur með tillögur að lausnum. Listamaðurinn leitar inn á svið stærðfræði, erfðalíffræði, jarðeðlisfræði, jafnt sem stjórnmálafræði og félagsvísinda, og stýrir rannsóknarverkefnum.
Gjörninga- og miðlaverkið Valdabarátta var gert fyrir sýninguna Red Cavalry : Creation and Power in Soviet Russia sem var sett upp í Casa Encendia (Madrid, 2011 og í Tate Modern (London, 2010). Á sýningunni voru, meðal annarra, verk eftir ljóðskáldin og rithöfundana Boris Pasternek, Vladimir Mayakovsky, Mikhail Bulgakov og Daniil Kharms; myndlistarmennina Wassily Kandinsky, Marc Chagall, Kazimir Malevich, Alexandr Rodchenko og Vladimir Tatlin; kvikmyndagerðarmennina Dziga Vertov og Sergei Eisenstein. Titill sýningarinnar vísað til samnefnds meistaraverks, þekkts málverks eftir Kazimir Malevich, sem var hluti af sýningunni.
Valdabarátta er skopstæling á “samkeppni” í samböndum á hvaða sviði lífsins sem er og sjónræn framsetning á eyðileggjandi eiginleikum hennar. Verkið byggir á nýjustu útgáfunni af þremur vírusvarnarforritum, sem eru ræst samtímis. Um leið hefst ,,valdabarátta”, þar sem forritin reyna að útrýma hvert öðru. Í lokin stendur eitt þeirra uppi sem sigurvegari, sem hefur þurrkað keppinauta sína úr tölvunni. Ferli baráttunnar er varpað á skjá þannig að áhorfendur geta veðjað á uppáhalds vírusvarnarforritið sitt.
Gjörningur eftir Olgu Kisseleva
Ásamt: Silju Báru Ómarsdóttur, stjórmálafræðingi, Stefáni Pálssyni, sagnfræðingi, Sólveigu Ólafsdóttur framkvæmdastjóra Reykjavíkurakademíunnar og Gylfa Magnússyni dósent í viðskiptafræði við Háskóla Íslands. Hugbúnaður : Oleg Kisele. Texti : Maxime Petiot
MYNDBANDSVERK EFTIR STEINUNNI GUNNLAUGSDÓTTUR
27.04.2013
Nýlistasafnið er opið frá k. 12:00 til 00:00 á kjördag, laugardaginn 27 apríl.
Sýnt verður myndbandsverkið Lýðræðið er pulsa eftir Steinunni Gunnlaugsdóttur. Verkið er satíra um kosningar og hið meinta valfrelsi sem í þeim felst. Þjóðarréttur Íslendinga, pulsan, myndgerir lýðræðið, pulsuvagn Bæjarins Bestu í miðbænum verður að kjörklefa og kosningarnar birtast í vali þegnanna á milli áleggstegunda og sósusorta á pulsuna. Pulsan sjálf er hins vegar ekki val – hana skal hver og einn einasti þegn innbyrða, með góðu eða illu.
Verkið er frá árinu 2009 og verður héðan í frá sýnt á þingkosningadegi Íslendinga um ókomna tíð, að þessu sinni í Nýlistasafninu.
Aðstoðarleikstjóri var Almar Erlingsson. Hljóðrásin var unnin með tveimur sameinuðum kórum, Anarkistakór Reykjavíkur og Nýlókórnum, sem kyrjuðu yfir myndefnið nokkur lykilhugtök lýðræðisins á borð við „frelsi,“ „kjósa“ og „þjóðin“.
Verkið verður aðeins sýnt þennan eina dag, frá klukkan 12:00 til 00:00.
FULLTRÚAR STJÓRNMÁLAFRAMBOÐA Í NÝLÓ
Fulltrúar framboðanna koma til með að sitja í pallborði og svara fjölbreyttum spurningum um áherslur framboðanna í tengslum við myndlist auk þess sem áhorfendum gefst kostur á að koma inn í umræðuna.
Eftirtaldir koma til með að taka þátt fyrir hönd sinna framboða:
A - Björt framtíð → Friðrik Rafnsson / Borghildur Sturludóttir
B - Framsóknarflokkurinn → Vigdís Hauksdóttir
D - Sjálfstæðisflokkurinn → Áslaug Friðriksdóttir
H - Húmanistaflokkurinn → Ragnar Sverrisson
J - Regnboginn → Friðrik Atlason
L - Lýðræðisvaktin → Hans Kristján Árnason
S - Samfylkingin → Skúli Helgason
T - Dögun → Margrét Tryggvadóttir
V - Vinstri græn → Álfheiður Ingadóttir
Þ - Píratar → Smári McCarthy
ÁRATUGUR - GRETAR REYNISSON
05.04.2013 - 14.04.2013
Föstudaginn 5. apríl kl. 20:00 opnar sýningin Áratugur eftir Gretars Reynissonar í Nýlistasafninu.
Nýlistasafnið er einn af stofnaðilum listahátíðarinnar Sequences og er eitt þeirra listamannareknu listrýma sem standa að hátíðinni, sem nú er haldin í sjötta sinn.
Í fyrsta sinn sem heildarverk Gretars, Áratugur, kemur fyrir sjónir almennings er það í samhengi listahátíðarinnar Sequences sem leggur áherslu á tímatengda list. Verk sem unnin voru hvern einasta dag í tíu ár eru til sýnis í aðeins tíu daga. Á vissan hátt má nefnilega segja að um sé að ræða skrásetningu á gjörningi, þótt gjörningurinn hafi staðið svo lengi að erfitt kunni að vera að greina á milli daglegs lífs og listræns athæfis.
Nánari upplýsingar um sýninguna má finna hér.
LISTAMANNASPJALL & SMIÐJA - TIONG ANG
16.03.2013
Laugardaginn 16. mars kl 15:00 mun listamaðurinn Tiong Ang ræða um verk sitt á sýningunni Dómgreindin er Spegill sem nú stendur yfir í Nýlistasafninu.
Spjallið fer fram á ensku er opið öllum og aðgangur ókeypis.
Tiong Ang er hollenskur myndlistarmaður fæddur í Indónesíu en býr og starfar í Amsterdam. Megin viðfangsefni listrænnar hugsunar hans eru sameiginlegt minni, útilokun, hið staðbundna og hnattræna. Verk hans Pavilion of Distance fæst við mismunandi stig meðvitundar og líkamann, sem lætur oft gegn vilja sínum, meðvitað eða ómeðvitað, stjórnast af þeim (fjöl)miðlum sem á okkur dynja. Ang sýnir okkur hvernig miðlarnir setja ekki einungis mark sitt á hugmyndir okkar um raunveruleikann heldur hafa einnig áhrif á það hvernig við skynjum staði og atburði.
Sýningin stendur til 24. mars, nánari upplýsingar um sýninguna má finna hér.
Smiðja
Á meðan á heimsókn Tiong Ang stendur mun hann, ásamt kvikmyndagerðar- og myndlistamanninum Alejandro Ramirez, vinna með MA nemum í myndlist við Listaháskóla Íslands og standa að smiðju sem verður í Nýlistasafninu dagana 19. - 21. mars.
NÝLÓ Í TBILISI Í GEORGÍU
08.03 - 09.03.2013
Dagana 8. og 9. mars mun Gunnhildur Hauksdóttir safnstjóri taka þátt í málþingi fyrir hönd Nýlistasafnsins í Tbilisi, Georgíu. Yfirskrift málþingsins er The Expanding Role of the Artist as Entrepreneur og er haldið í tengslum við sýninguna Nordic Art - Between Miracles í CCAT. Nánari upplýsingar um málþingið og sýninguna má finna hér.