Myndlistarhátíðin Sequences fer brátt af stað í ellefta skipti og býður upp á myndlistarsýningar, gjörninga, tónleika, kvikmyndasýningar og almennt hátíðarhald!

Hátíðin hefur aldrei verið jafn stór en yfir 50 listamenn koma saman á hátíðinni og spannar hún 10 daga,13.-22. október. Sýningarnar munu standa til 26 nóvember.  

Sequences XI: Get ekki séð

Sequences XI: Get ekki séð er skipt í fjóra kafla:Jarðvegur, Neðanjarðar,Vatn og Frumspekivíddin. Hver kafli tekur yfir eitt af sýningarrýmum hátíðarinnar, sem eru Kling & Bang, Nýlistasafnið, Norræna húsið og Safnahús Listasafns Íslands.

Get ekki séð sprettur úr myrkri sem umlykur. Sýningin fæddist út frá þeirri tilfinningu að heimurinn sé að molna í höndum okkar, á meðan hvassviðrið þyrlar síðustu dropunum af dreggjum hans enn lengra. Við sjáum ekki sívaxandi ógn vistfræðilegrar eyðileggingar, rétt eins og við sjáum ekki mögulegar nýjar leiðir og líf sem gæti kviknað úr rústum gamla heimsins.

Þessir fjórir kaflar veita innsýn í rýmin og andartökin sem mannlegt auga nemur yfirleitt ekki: allt frá hafsbotni og jarðlögunum að braki fortíðar og draumum um framtíðina. Sögurnar eru sagðar frá ýmsum sjónarhornum, allt frá blendingsfuglum, bakteríum, sjávarlífverum, ævafornu tré eða óþreytandi vindinum. Markmiðið er að velta upp ólíkum leiðum til að sjá og upplifa heiminn og fjarlægjast þannig þau sjónarhorn sem við eigum að venjast. Teygjanlegur tími leyfir okkur að ferðast langt aftur í goðsagnakennda fortíð eða ímynda okkur ókomna framtíð. 

Hátíðin teygir líka anga sína út fyrir sýningarsalina, til að mynda með innsetningu Precious Okoyomon og Dozie Kanu í Gróttuvita, vindskúlptúrnum Powerless flight eftir John Grzinich en hann verður staðsettur á svæðinu milli Edition Hótel og Hörpu, og útiskúlptúrunum Vetrarsamsetning eftir Grzegorz, en þeir verða sýndir umhverfis Marshallhúsið á Granda.

Vegleg gjörningadagskrá veitir síðan tækifæri til að sameinast á myrkasta tíma ársins og deila orku og hugmyndum. Gjörningarnir flytja okkur oftar en ekki að jaðri umbreytinga, að líkamlegum takmörkunum og færa hug okkar á ný mið.

Útiverkin og gjörningarnir skapa þannig í samfloti við sýningarnar rými fyrir ímyndunarafl og táknræna hugsun og gefur okkur færi á að sjá lengra frá okkur.

Hátíðardagskrá

Dagskrá opnunarhelgarinnar er nú orðin aðgengileg og lesa má nánar um hvern og einn viðburð á heimasíðu Sequences.

Föstudagurinn 13. október 

16:00 — Frá Listasafni Reykjavíkur niður í Marshallhúsið: O Opnunargjörningur Aaloe-Ader-Flo-Künnap-Soosalu
17:00 — Nýlistasafnið: Sýningaropnun gjörningur eftir Johanna Hedva
18:00 — Kling & Bang. Veitingar í boði Polu Sutryk
20:00 — Bíó Paradís: Opnunarpartí
 

Laugardagurinn 14. október

11:00 — Gróttuviti: Opnun á innsetningu Precious Okoyomon og Dozie Kanu
15:00 — Kling & Bang og Nýlistasafninu: Leiðsögn sýningarstjóra
18:00 — Norræna húsið: Sýningaropnun með gjörningi eftir Edith Karlson 
21:00 — Tóma rýmið:  Gjörningurinn Traps eftir Johhan Rosenberg (miðasala)
 

Sunnudagurinn 15. október

10:00 –17:00 — Rútuferð: Hitabeltisnorðrið með Eddu Kristínu Sigurjónsdóttur (skráning)
14:00 — Kambarnir, Hellisheiði: Innsetning Þorgerðar Ólafsdóttur afhjúpuð
16:00 — Gallery Port: Sýningaropnun í Gallery Port
18:00 — Safnahúsið, Listasafn Íslands: Sýningaropnun
18:30 — Safnahúsið, Listasafn Íslands: Gjörningur eftir Bendik Giske og Úlf Hanson
21:00 — Tóma rýmið:  Gjörningurinn Traps eftir Johhan Rosenberg (miðasala)

Um sýningarstjórana

Sýningarstjórateymið samanstendur af fjórum eistneskum sýningarstjórum og rithöfundum: Marika Agu, Maria Arusoo, Kaarin Kivirähk og Sten Ojavee sem hafa unnið saman frá árinu 2017 hjá Estonian Centre for Contemporary Art (CCA). Listrænar áherslur teymisins mynduðust í fyrstu sýningunni sem þau stýrðu saman.A-tishoo, A-tishoo, We All Fall Down (2019) sem var sýnd í EKKM, Contemporary Art Museum of Estonia. Þau hafa einnig sýningastýrt og skipulagt ráðstefnur, fyrirlestraraðir, ritgreinar, list í almannarými og stafræna viðburði. Sem sýningarstjórar hafa þau fjölbreyttan bakgrunn m.a. myndlist, félagsfræði, heimspeki, listasögu og merkingarfræði. Þau hafa tekið höndum saman til að sameina ólíka reynslu og hugsunarhátt, til að bjarga auðlindum og draga úr offramleiðslu. Þau trúa því að samvinna geri okkur kleift að skapa sjálfbærari vinnuferla og skili víðtækari árangri.

Um Sequences

Sequences er alþjóðlegur myndlistatvíæringur í Reykjavík. Að hátíðinni standa Kling & Bang og Nýlistasafnið, Kynningarmiðstöð íslenskrar myndlistar ásamt öflugu fagráði sem í sitja listamenn og óháðir aðilar sem eru virkir í listamannareknu senunni í Reykjavík hverju sinni. Undirtitill Sequences, real time art festival, vísar til upphaflegrar áherslu hátíðarinnar á tímatengda miðla og verk sem unnin eru í rauntíma. Í dag er titillinn vegvísir sem sýningarstjórum er frjálst að túlka og vinna með fyrir hverja hátíð.

Sequences er sýningarvettvangur fyrir innlenda og erlenda myndlistamenn og stuðlar að stækkuðu starfsumhverfi listamanna og enn litríkara menningarlífi í Reykjavík. Hátíðin styður einnig við grasrót myndlistar hérlendis og er ætlað að vera hvetjandi umhverfi til sköpunar nýrra verka. Sequences veitir nýjum straumum og framsækinni myndlist rými og gefur almenningi færi á að upplifa alþjóðlega samtímamyndlist á heimsmælikvarða.

Samstarfs- og styrktaraðilar Sequences XI:

Nordic Culture Point, Estonian Ministry of Culture, Estonian Cultural Endowment, Helsinki International Artist Programme, Estonian Centre for Contemporary Art, Myndlistarsjóður, Barnamenningarsjóður, Reykjavíkurborg, Listasafn Íslands, Norræna húsið, Listasafn Reykjavíkur, Business Iceland.

Myndir með frétt:

#1: Titilmynd, grafísk hönnun: Hrefna Sigurðardóttir

#2: Antidote / Mótefni,Pakui Hardware

#3: Powerless Flight / Kraftlaust flug, John Grzinich

#4: The Myth: Last Day / Goðsögnin: síðasti dagur,Netti Nüganen